Монгол Улс, БНСУ-ын ГХЯ хоорондын Консулын IX зөвлөлдөх уулзалт Улаанбаатар хотноо болов. Консулын зөвлөлдөх уулзалтад монголын талын төлөөлөгчдийг ГХЯ-ны Консулын газрын захирал Я.Ариунболд, солонгосын талын төлөөлөгчдийг тус улсын ГХЯ-ны Гадаадад байгаа солонгос иргэд, консулын асуудал хариуцсан Элчин сайд Хан Донг-ман нар тус тус тэргүүлж оролцжээ.
Энэ удаагийн консулын уулзалт үеэр хоёр тал консулын харилцааг хөгжүүлэх, хөдөлмөрийн гэрээгээр ажиллагсдыг нэмэгдүүлэх, тус тусын иргэдэд тулгамдаж байгаа асуудлаар өргөн хүрээтэй санал солилцож, зарим чиглэлээр холбогдох арга хэмжээ авч ажиллахаар тохиролцов. Үүнээс гадна иргэд зорчих нөхцөлийг шат дараатай хөнгөвчлөх үүднээс иргэдэд олон удаагийн виз олгох нөхцөлийг өргөжүүлэхийн зэрэгцээ визийн хугацаа хэтрүүлэх, хууль ёсоор оршин суух иргэдийг нэмэгдүүлэх замаар зөвшөөрөлгүй оршин суух тохиолдлыг бууруулах талаар санал солилцлоо.
Солонгосын талаас хөрөнгө оруулагчдад оршин суух зөвшөөрлийг 1-3 жилээр олгох, төрийн бус байгууллагын гишүүдийг ажлын байрны төлбөрөөс чөлөөлөх, нийгмийн даатгалын хэлэлцээрийн хэрэгжилтийн талаар санал тавилаа.
Консулын уулзалтад ХЗДХЯ, ХНХЯ, УЕПГ, ГИХГ, ХХЕГ, ЦЕГ, ЭМНДГ зэрэг байгууллагуудаас төлөөлөл оролцов. Уулзалт илэн далангүй, найрсаг уур амьсгалд өрнөж, хоёр улсын харилцааг хөгжүүлэх, ард түмэн, иргэд хоорондын хэлхээ холбоог бэхжүүлэхэд чиглэгдсэн үр дүнтэй арга хэмжээ болов.
