Өсвөр насны хүүхдүүдийн дунд хорт зуршил болоод байгаа мансуурах явдал гаарсаар байна. Саяхан гэхэд  Өсвөр насны хүүхдүүд мансуурч байгаад нэг нь амиа алдсан харамсалтай явдал болжээ.

Өнгөрсөн онд ийм хэрэг гурав гарч байсан бөгөөд тэдгээр хүүхдүүд эмнэлгийн тусламж авч чадалгүй амиа алдсан билээ. Тиймээс  таны хүүхэд хаана хэнтэй нийлж, юу хийж явааг анхаарах хэрэгтэй гэдгийг эцэг эхчүүдэд мэргэжлийн байгууллагаас зөвлөсөөр байна. “Өсвөр насны хүүхэдтэй эцэг эхчүүдэд хандаж хэлэхэд таны хүүхэд шилжилтийн буюу эмзэг насан дээрээ явж байгаа гэдгийг байнга санаж явах хэрэгтэй. Бид бүгд энэ үеийг дамжаад гарсан. Тэд чинь өнөөдөр хүүхэд биш, том хүн биш завсарын үедээ явж буй хүүхдээ хүлээн зөвшөөрч сураарай. Хамгийн гол нь хүүхэдтэйгээ илэн далангүй, найз нөхөд шиг нь ярьж сурах хэрэгтэй.

Хүүхдийнхээ хүсэл бодлыг чагнаж, гэр бүлдээ өнгөрүүлэх цагаа ихэсгээч ээ. Хүүхэд тань хэнтэй, хаана ямар хүмүүстэй нөхөрлөөд юу хийгээд яваад байгааг мэдэх хэрэгтэй. Мөн хүүхдээ зөвхөн багш нарт нь даатгаад орхихгүй, өөрсдөө анхаарал хандуулж, яавал хүүхдээ хамт олон дунд нь аятай байлгах уу гэдгийг хүртэл багш нар, найз нөхөдтэй нь холбогдож мэдэх нь чухал юм. Үнэндээ таны хүүхэд бие нь өсгөлөн том багаа ч сэтгэхүй нь жижигхэн хүүхдээрээ байгаа гэдгийг л маш сайн ойлгох ёстой” хэмээн СЭМҮТ-ийн Хүүхэд, өсвөрийн клиникийн эрхлэгч Д.Энхтуяа зөвлөж байна..