Ийм харамсалтай хэрэг өчигдөр буюу тавдугаар сарын 3-ны өглөө гарчээ. Мэдээллийн тодруулбал Улаан-Үдийн оюутны дотуур байрны ариун цэврийн өрөөнөөс дөнгөж төрсөн хүүхдээ дарж ухаан алдсан байдалтай 17 настай оюутан олджээ.

Оюутан монгол охин байсан бөгөөд нярай нас барсан байсан байна. Тус оюутныг Эрүүгийн хуулийн 106 дугаар заалт буюу “төрсөн хүүхдээ санаатайгаар бүрэлгэсэн” хэмээн ОХУ-ын цагдаагийн байгууллагаас шалгаж эхэлсэн байна. Тэрбээр 2016 оны намар Буриадын их сургуульд суралцахаар ирсэн нэгдүгээр курсын оюутан байжээ. Тэрээр дотуур байрандаа нутгийнхаа охинтой амьдардаг байсан бөгөөд орос хэл мэдэхгүй учир монголчуудаас бусад хүмүүстэй харьцдаггүй байсан аж. Өрөөнийхөн, багш болон бусад хүмүүс түүнийг жирэмсэн гэдгийг нь мэдээгүй байсан хэмээжээ.

Тэрээр лхагва гаригийн үүрээр 04:00 цагийн үед өрөөнөөсөө гарч ариун цэврийн өрөөнд орж хаалгаа түгжиж байгаад хүүхдээ төрүүлсэн аж. Цагийн дараа дотуур байрны харуул аюулгүй байдлыг шалгаж яваад ариун цэврийн өрөөний түгжээтэй бүхээгээс ихээхэн хэмжээний цус урссан байхыг олж харжээ. Бүхээгийг онгойлгон ортол охин их хэмжээний цус алдаж ухаан алдсан байсан бөгөөд түүний дор дөнгөж төрөөд эндсэн нярай байжээ.

Харуул түргэн тусламж дуудаж, яаралтай эмнэлгийн тусламж үзүүлснээр охины амийг аварсан байна. Нярайн үхлийн шалтгааныг тогтоохоор шинжээчид ажиллаж байгаа аж.