Дөрвөн настай дагавар охиноо хөнөөсөн хэргээр ял сонссон Г.Маралмаа хэргийн материалтай танилцах явцдаа хүчиндүүлсэн гэх гомдол гаргасан талаар бид мэдээлсэн.

Тодруулбал Баянзүрх дүүргийн шүүхийн байрны хүлээлгийн өрөөний халуун усны өрөөнд дэслэгч Б-д хүчиндүүлсэн хэмээн гомдол гаргасан. Гомдлын дагуу хүчиндсэн гэх цагдаагийн албан хаагч Б-гээс ч тайлбар мэдүүлэг авсан.  ЦЕГ-ын Хэвлэл мэдээллийн төвийн дарга Н.Ганбадрал "Хүчиндсэн асуудал байхгүй. Толгой өвдөөд байхаар нь өрөөндөө оруулж толгойгоо л бариулсан" хэмээн мэдүүлсэн.

Гэтэл мөрдөн байцаалтын явцад Г.Маралмааг хүчиндсэн гэх цагдаа Б гэртээ зүрх нь хаагдаж амиа алдсан байдалтай олдсон. Энэхүү хэргийг ч шалгаж эхэлсэн байгаа талаар бид цаг тухайд нь мэдээлсэн. Тэгвэл дөнгөж сая энэ хэргийн талаар Цагдаагийн Ерөнхий газраас мэдээлэл хийлээ. “Өнгөрсөн 4 дүгээр сарын 28-ны өдөр шүүхээс ял шийтгэгдсэн эмэгтэй М-ийг шүүхийн цагдаа хүчирхийлсэн гэсэн мэдээлэл ирсэн.

Мэдээллийн дагуу Мөрдөн байцаах албаны тусгай сүбьектийн үйлдсэн гэмт хэргийг мөрдөх хэлтсээс шалгаж эхэлсэн. Шалгагдах хугацаанд иргэн Б нь Сүхбаатар дүүргийн 13 дугаар хороонд орших гэртээ өөрийгөө боомилсон байдалтайгаар амь насаа алдсан байсан. Энэ хэргийн Сүхбаатар дүүргийн хоёрдугаар хэлтэс шалгаж байна. Гэрээслэл үлдээсэн талаар мэдээлэл байгаа. Гэхдээ энэ талаар мөрдөн байцаалт явагдаж байгаа тул мэдээлэл өгөх боломжгүй” гэлээ.