Төрийн өмчийг хувьдаа завшсан хэмээн энэ сарын 23-нд Чингэлтэй дүүргийн шүүхээс 3.6 жилийн хорих ялаар шийтгүүлсэн П.Даш, Л.Алтангэрэл нарын хэргийн талаар Нийслэлийн шүүхийн Ерөнхий шүүгч Б.Сарантуяагийн туслах А.Сарантуяатай ярилцлаа.
    Төрийн өмчийг хувьдаа завшсан хэмээн энэ сарын 23-нд Чингэлтэй дүүргийн шүүхээс 3.6 жилийн хорих ялаар шийтгүүлсэн П.Даш, Л.Алтангэрэл нарын хэргийн талаар Нийслэлийн шүүхийн Ерөнхий шүүгч Б.Сарантуяагийн туслах А.Сарантуяатай ярилцлаа. П.Даш, Л.Алтангэрэл нар нь өнгөрсөн оны есдүгээр сарын 29-нд Хан-Уул дүүргийн шүүхээс 3.6 жилийн хорих ялаар шийтгүүлж байсан ч “Өршөөл үзүүлэх тухай хууль”-д хамрагдан өршөөгдөж байсан. Гэвч “Би буруугүй, цагаадах ёстой” хэмээн давж заалдах шатны шүүхэд хандаж байсан юм. Харин давж заалдах шатны шүүхээс түүний хэргийг анхан шатны шүүх рүү буцааснаар тэрээр анхан шатны шүүхээс дахин ял сонссон билээ.

-П.Даш, Л.Алтангэрэл нар өмнө нь ял сонсон өршөөгдөж байсан ч энэ удаа дахин  ял сонслоо. Тэдний хэргийн талаар тодруулахгүй юу?

-П.Даш нь ОБЕГ-ын даргаар ажиллаж байхдаа тус газрын нөөц бүрдүүлэлтийн газрын дарга Л.Алтангэрэлтэй албан тушаалын байдлаа урвуулан ашиглаж бүлэглэн онц их хэмжээний хохирол учруулсан байдаг. Тодруулбал, Л.Алтангэрэлийн эхнэр Г.Оюунчимэгийн нэр дээр байдаг “АО Жаргалант” ХХК-ийн нэрээр шатахуун нийлүүлэх гэрээг байгуулан 1.9 тэрбум төгрөг шилжүүлсэн. Тэгэхдээ зах зээлийн өндөр үнээр  шатахуун худалдан авч, зөрүү 237.400.000 төгрөгийг хувьдаа завшсан. Мөн П.Даш ганцаараа “Алтай таван богд хайрхан” ХХК-тай үрийн буудай худалдан авах гэрээг байгуулан 1.3 тэрбум төгрөг шилжүүлсэн. Дараа нь давтан гэрээ байгуулж, 199.336.000 төгрөгийн авлага үүсгэж, улаан буудайг зах зээлийн өндөр үнээр худалдан авч 142.000.000 төгрөгийг үрэгдүүлэн, 341.336.000 төгрөгийн хохирол учруулсан. Мөн Л.Алтангэрэл нь ганцаараа нэг ширхэг  нь 9000 төгрөгийн үнэтэй байсан М-140 маркийн радиаторыг 5000 төгрөг болгон бууруулж, өөрийн “Аргалант бороо” ХХК-ийн нэрээр авч, байгууллагадаа 30.800.000 төгрөгийн хохирол тус бүр учруулсан гэмт хэрэгт холбогдсон байдаг.

-Хэргийн шийдвэрлэлтийн талаар?

-Прокуророос П.Даш, Л.Алтангэрэл нарт шатахуун нийлүүлэх гэрээний асуудалтай холбоотой үйлдэл, П.Дашийн улаан буудай худалдан авах гэрээний асуудалтай холбоотой үйлдлүүдийг анхан шатны шүүхээс хэрэгсэхгүй болгосон.

-Хан-Уул дүүргийн шүүхээс хэргийг “Өршөөл үзүүлэх тухай хууль”-д хамруулан өршөөж байсан биз дээ?

-Эрүүгийн хуулийн тусгай ангийн 263 дугаар зүйлийн 2-т зааснаар тодорхой албан тушаал эрхлэх эрхийг тус бүр 2 жилийн хугацаатайгаар хасч, 3 жилийн хорих ял ногдуулж байсан. Тэгээд тэдэнд оногдуулсан ялыг 2009 оны “Өршөөл үзүүлэх тухай хууль”-ийн 4.4-т зааснаар бүхэлд нь өршөөн хэлтрүүлсэн байдаг.

-Энэ сарын 23-нд тэд Чингэлтэй дүүргийн шүүхээс дахин ял сонслоо. Өмнө нь “Өршөөл үзүүлэх тухай хууль”-иар өршөөгдөж байсан. Тэгэхээр энэ удаа бас өршөөгдөж болоогүй юм уу?

-Энэ удаа ч гэсэн тэдний хэрэг “Өршөөл үзүүлэх тухай хууль”-д хамрагдсан. Тодруулбал, тэднийг Эрүүгийн хуулийн тусгай ангийн 150.3-т зааснаар тус бүрээс 5.000.000 төгрөгийн эд хөрөнгийг хурааж, 6.6 жилийн хорих ялаар шийтгэсэн. Улмаар “Өршөөл үзүүлэх тухай хууль”-д хамруулан, 3 жилийг хасч биечлэн эдлэх ялыг 3.6 жилийн чанга дэглэмтэй хорих ангид эдлүүлэхээр шийдвэрлэсэн.

-Тэгэхээр ОБЕГ-т учирсан хохирлыг яах вэ?

-Иргэний хуульд зааснаар П.Дашаас 460.036.000 төгрөгийг, Л.Алтангэрэлээс 149.500.000 төгрөгийг гаргуулж, ОБЕГ-т олгохоор шийдвэрлэсэн байдаг.