Төрийн тусгай албан хаагчдын нэгдсэн эмнэлэг (ТТАХНЭ)-ээс 2017 оны 07 дугаар сарын 17-ны өдөр томилогдсон шуурхай хоёр бүлэг Төв аймгийн Батсүмэр суманд, Сэлэнгэ аймгийн Мандал сумын Түнхэлд тус тус ажиллаад 2017 оны 07 дугаар 20-ны өдөр үүргээ биелүүлээд ирлээ. Шуурхай нэгдүгээр бүлгийг ТТАХНЭ-ийн гэмтлийн их эмч, дэд хурандаа Б.Баттөмөр ахлан, шуурхай хоёрдугаар бүлгийг ТТАХНЭ-ийн мэдрэлийн их эмч, дэд хурандаа Б.Мөнх-Оч ахлан ажиллаад ирсэн билээ. Шуурхай нэгдүгээр бүлгийг ахласан ТТАХНЭ-ийн гэмтлийн их эмч, дэд хурандаа Б.Баттөмөртэй ярилцлаа.
-Таны хувьд 2017 оны 07 дугаар сарын 17-ны өдөр Төрийн тусгай албан хаагчдын нэгдсэн эмнэлэг (ТТАХНЭ)-ийн шуурхай нэгдүгээр бүлгийг ахлан 6 хүний бүрэлдэхүүнтэйгээр Төв аймгийн Батсүмбэр суманд ажиллан, үүргээ биелүүлээд ирсэн.
-Манай эмнэлгийн зүгээс захирлын тушаал, Эрүүл мэндийн яам, Хууль зүй, дотоод хэргийн сайдын хамтарсан шийдвэрийн дагуу гал түймэртэй тэмцэж буй Онцгой байдлын ерөнхий газрын албан хаагчид, түймэрт дайчлагдан ажиллаж буй бусад бие бүрэлдэхүүн, сайн дураараа оролцож буй ард иргэдийн эрүүл мэндийг анхаарах, шаардлагатай тусламжийг газар дээр нь үзүүлэх зорилгоор шуурхай 2 бүлэг гал түймрийн голомт руу томилогдон ажилласан. Миний хувьд эмнэлгийн шуурхай нэгдүгээр бүлгийг ахлан ажиллаад ирлээ.
-Тухайн нутаг дэвсгэрт гарсан гал түймрийн байдал ямар байсан бэ?
-Тухайн нутаг дэвсгэрт манай бүлгийг очиход гал түймэр нилээн газар авсан, хүнд хэцүү байдалтай, тэнд ажиллаж буй мэргэжлийн болон сайн дурынхны хувьд бол байдал үнэхээр хэцүү байсан. Эх орон минь нүдэн дээр шатахад сэтгэл үнэхээр өвдөж байсан. Байгалийн ийм гамшгийн өмнө хүн хүчин мөхсддөг юм билээ. Хүн хүчний хувьд дутагдалтай. Хэдийгээр цурманд оруулж, түр зуур унтрааж байсан ч цаашид дахих, газар авахаас нь хамгаалж манаж хонох, дахин дэгдэхэд нь унтраадаг ийм л байдалтай байлаа. Нөхцөл байдлын хувьд төсөөлж байснаас үнэхээр хүнд байсан. Тэнд ажиллаж байсан онцгой байдлын албан хаагчид дөрөвдүгээр сард Минжийн хангайгаас гарсан гал түймэрт ажиллаж байсан албан хаагчид ч байсан. Тэд гэр орондоо 3 хоног амарсан уу? үгүй юу? буцаад Түнхэлийн түймэрт дайчлагдаад ажиллах жишээтэй. Тэнд янз бүрийн хугацаанд ажиллаж байсан цэргийн албан хаагч болон онцгой байдлын албан хаагчид байсан.
-Тухайн нутаг дэвсгэрийн ард иргэдийн байдал ямархуу байсан бэ?
-Нутгийн иргэд бол өөрсдийн газар нутагтаа байгаа болохоор нутаг орноо хамгаалах, гал түймрийг илүү өргөн хүрээ эзлэхээс нь өмнө хурдан унтраая гэсэн чин эрмэлзэлтэй ч. Үнэхээр хүчин мөхөсдөж байсан болохоор сайн дурынхан бусад хүмүүсийг ирэхэд дуртай хүлээж авч байсан гэсэн.
-Төрийн тусгай албан хаагчдын нэгдсэн эмнэлгийн шуурхай нэгдүгээр бүлгийн зүгээс эмнэлгийн ямар тусламж, үйлчилгээ үзүүлсэн бэ?
-Манай эмнэлгийн зүгээс гал түймэрт анх удаа бүлэг томилогдон ажилласан. Биднийг тухайн гал түймэр гарч буй нутаг дэвсгэрт очиход онцгой байдлын албан хаагч, нутгийн иргэд, төрийн албан хаагчдын дийлэнх нь даралт ихсэх, харших, хатиг мундастай, арьсны идээт үрэвсэлтэй, хоолой өвдсөн, хөнгөн хэлбэрийн угаартсан зэрэг зовиур шаналгаатай байсан. Бид эмнэлгийн тусламж үзүүлж, шаардлагатай хүмүүсд нь эмчилгээ хийсэн. Суурин газраас 50, 60 километрийн зайтай уулын аманд байгаа бүлэг, бүлгүүд хоорондоо 30, 40 километрийн зайтай бартаат замтай, зам харгуу их муу, уулын мухарт байрласан байсан болохоор тэр болгон эмнэлгийн тусламж байтугай өөрсдөө ирэх боломжгүй байсан нөхцөлд шуурхай бүлэг очсоноор газар дээр нь тусламж үзүүлж чадсан.
-Тухайн газарт ажиллаж байхад хүндрэл гарч байсан уу?
-Бидний зүгээс шаардлагатай эм тариа, боох материалаа урьдын бэлэн байдлынхаа үүднээс авч явсан. Бид анх удаа гал түймэрт явж байгаа болохоор түлхүү түлэгдэж, гэмтэж бэртсэн хүмүүс байх болов уу? гэж бодсон боловч яг бодит байдал дээрээ өөр байсан. Харьцангуй түлэгдэж, гэмтсэн нь бага. Харин түүнтэй холбогдолтойгоор ус аваад уул руу дээш доошоо явах, халуун галтай ойр байснаас холбоотой даралт ихсэх, амьсгалын дээд замын үрэвсэл байх жишээтэй. Мөн хөнгөн хэлбэрийн угаартсан хүмүүс байсан. Цаашид бүлэг бүлгээр явахдаа эдгээр дээр анхаарах нь зүйтэй юм гэж дүгнэж байна.
-Нилээд иргэд сайн дураараа очин тусалсан байгаа. Мэдээж сайн дурын иргэдийн хувьд гал түймэр унтраах мэдлэг дутмаг. Энэ тал дээр хэр асуудал гарч байсан бэ?
-Тэнд туслахаар очсон сайн дурын иргэд маань онцгой байдлын ажилчид, албан хаагчдын удирлаган дор гал түймэр унтраахад оролцож байсан юм байна лээ. Сайн дурынхан дүрэлзэж байгаа галнаас зайтай, цурманд оруулах, цурманд орсон түймрийг манах зэрэг харьцангуй хөнгөн хэлбэрийн ажиллагаанд нь оролцож байсан.
-Цахим ертөнцөд гал түймэр унтраахаар явсан зарим иргэдийг хувийн тоглолт хийж, наргиж цэнгэх гэж очсон зэрэг шүүмжлэлүүд гарч байсан. Энэ хэр бодитой байсан бэ? Үнэхээр танай бүлгийг очиход ийм асуудал гарав уу?
-Бид газар дээр нь очоод онцгой байдлын ерөнхий газрын харьяа гал сөнөөгчид, нутгийн иргэд, Төв аймгийн төрийн захиргааны албан хаагчидтай уулзаж байхад ийм асуудал гарсан талаар хэлж байсан. Шоу, реклам хийж байгаад буцсан хүмүүс ч байсан гэсэн. Хэдий сайны хажуугаар саар гэгчээр эдгээр асуудлууд гарсан ч гэсэн үнэхээр сайн дураараа ирээд гал сөнөөгчдөөс дутахааргүй галын голомтод нь ороод ажилласан хүмүүс ч байсан.
-Эмнэлгийн болон ард ард иргэдийн зүгээс цаашид ийм онцгой нөхцөлд анхаарах зүйл нь юу байсан бэ?
-Эмнэлгийн зүгээс бол эмнэлгийн шуурхай бүлэг томилолт аваад явахад бэлэн хэдэн бүлэгтэй. Ард иргэдийн хувьд хэдий сайн дураараа, санаачлагатай оролцож байгаа ч гэсэн шорт, углааштай очсон зарим нэг хүмүүс гал унтраахаас илүүтэй бусаддаа төвөг удах их жишээтэй. Тиймээс сэтгэл зүй болон хувийн бэлтгэлээ хангах ёстой юм болов уу? гэсэн зүйл ажиглагдсан.
-Төрийн тусгай албан хаагчдын нэгдсэн эмнэлэг(ТТАХНЭ)-ийн эмч нарын хувьд бусдаас 2 тангарагтай гэдгээрээ ялгардаг онцлогтой. Үнэхээр ийм онцгой нөхцөлд ялгарах онцлог нь юу байв?
-Манай эмнэлэг цэргийн эмнэлэг. Бид цэргийн болон эмчийн тангарагтай хүмүүс. Хичнээн томилгоо аваад явсан ч гэсэн бид эх орноо гэсэн чин эрмэлзэлтэй. Тухайн газар дээр нь очоод хаана ямар бүлэг байна яг тэр болгон дээр нь хүрч, очиж ажиллаж чадсан. Манай эмнэлгийн шуурхай 2 бүлэг явснаас Сэлэнгэ аймгийн Мандал сумын Түнхэл тосгоны чиглэл, нөгөөх нь Төв аймгийн Басүмбэр чиглэлд ажилласан. Явсан 2 бүлэг маань өөр өөрсдийн харьяалагдаж байгаа нутгийн гал сөнөөгчдөд яг газар дээр нь очиж тусламж үзүүлж чадсанаараа онцлог. Хэдий тушаал аваад явсан ч гэсэн иргэнийхээ үүргийг давхар гүйцэтгэсэн гэж бодож байна.
-Төрийн тусгай албан хаагчдын нэгдсэн эмнэлэг(ТТАХНЭ)нь хилийн хөдөлгөөнт бүлэгтэй. Энэ бүлэг нь Монгол Улсын хилийн алслагдсан анги, заставуудын бие бүрэлдэхүүнд эрүүл мэндийн тусламж, үйлчилгээ үзүүлдэг. Энэ талаар.
-Манай эмнэлгийн чиг үүрэг нь харьяа байгууллага, ард иргэдэд эмнэлгийн тусламж үйлчилгээ үзүүлэхээс гадна эх орноо манаж байгаа хилчдэд яг ажлын талбарт, газар дээр нь очиж урьдчилан сэргийлэх үзлэг хийж, шаардлагатай хүмүүсд эмчилгээ, үйлчилгээ хийх хилийн хөдөлгөөнт бүлэг томилогдон явдаг. Ингэж явснаар тэр болгон алс хязгаараас суурин газар ирж чаддаггүй цэргийн албан хаагч болон ар гэрийнхэнд очиж тусламж, үйлчилгээ үзүүлдэг. Энэ нь тодорхой давтамжтай хугацаатай үзлэг болохоор дараа ирэхэд ямар өөрчлөлт гарсан юун дээр нь анхаарах ёстой гэсэн судалгаа бас давхар явагдаж байдаг. Өвчилсөн албан хаагч болон ар гэрийнхнийг нь эрүүлжүүлэх төлөвлөгөө гаргах ажлыг зохион байгуулдаг билээ.
-Таны хувьд цэргийн гэсэн тодотголтой болоод хэдэн жил болж байна?
-Би 2000 оноос хойш цэргийн болоод 17 дахь жилдээ ажиллаж байна.
-Таны бахархал тань юу вэ?
-Миний эх орон.
-Бидэнд цаг зав гарган ярилцсанд баярлалаа. Таны цаашдын ажил хөдөлмөрт тань амжилт хүсье.
-Баярлалаа.
Сэтгэгдэл (4)