Өмнөговь аймгийн Гашуунсухайт боомтоор эрдэс баялаг болон нүүрс тээвэрлэж байгаа хүнд даацын автомашины цуваа олон арван км үргэлжилж, оочир үүссэний улмаас нэг удаа хил гарахдаа 3-4 өдрийн хугацааг зарцуулдаг байсан.
Тэгвэл Хил хамгаалах байгууллагаас хүнд даацын автомашины хилээр орох гарах урсгалын тоог нэмэгдүүлж, хил хэвтрэх баримт бичиг шалгагчийн кабиныг байгуулснаар оочир дараалал эрс буурч, жолооч нар чирэгдэлгүйгээр хил нэвтрэх боломж бүрджээ. Хил хамгаалах байгууллага Монгол Улсын Хилийн тухай хуулийн дагуу улсын хилээр зорчигч, тээврийн хэрэгслийг шалган нэвтрүүлэх, хилийн боомтын аюулгүй байдлыг хангах, хилийн боомтод мөрдөх журмыг сахиулах чиг үүргийг энэ оны хоёрдугаар сарын 1-ний өдрөөс ахин хэрэгжүүлж эхэлсэн.
Энэ хүрээнд Хил хамгаалах байгууллага Монгол Улсын Засгийн газраас өгсөн чиглэлийн дагуу хилийн боомтуудын үйл ажиллагааг сайжруулах, зорчигч, тээврийн хэрэгслийг улсын хилээр аливаа хүндрэл, бэрхшээлгүйгээр шуурхай шалган нэвтрүүлэх чиглэлээр цогц арга хэмжээг шат дараалан хэрэгжүүлж байна.
Тухайлбал, Өмнөговь аймгийн Хилийн 0131 дүгээр ангийн хариуцсан хэсэг Гашуунсухайт боомтоор хил нэвтэрч буй зорчигч тээврийн болон эрдэс баялаг тээвэрлэж буй автомашины жолооч нарын хил нэвтрэх эрхийн баримт бичгийг шалгагчийн тусгай зориулалтын 14 кабиныг ашиглалтад хүлээн авлаа. Тус кабин ашиглалтад орсноор Гашуунсухайт боомтоор нүүрс болон зэсийн баяжмал тээвэрлэж байгаа жолооч нарын хил нэвтрэх эрхийн бичгийг хамгийн ихдээ нэг минутад багтаан шалгах боломжтой болж байгаа юм. Өөрөөр хэлбэл тус боомтоор өдөрт 1500 орчим нүүрс тээврийн автомашиныг хилээр шалган нэвтрүүлдэг байсан бол өнөөдрөөс эхлэн 3000 орчим автомашиныг нэвтрүүлэх боломжтой боллоо.
Тус кабин нь эрүүл, аюулгүй байдлыг бүрэн хангасан, шаардлагатай програм бүхий компьютер, гэрэл дохио, агааржуулагч зэрэг хамгийн сүүлийн үеийн тоног төхөөрөмжүүд суурилуулагдсан гэдгээрээ онцлогтой. Үүнийг дагаад алба хаагчдын ажиллах орчин эрс сайжирч байгаа юм. Мөн эрдэс баялаг тээвэрлэж буй жолооч нар хэдэн өрдөөр олон арван км оочирлож байж хил нэвтэрдэг асуудал өөрчлөгдөж, цаг хугацааг ихээхэн хэмнэж байгаа нь хамгийн чухал.
Энэ утгаараа тус боомтоор экспортлож байгаа эрдэс баялагаас улсын болон орон нутгийн төсөвт төвлөрөх татвар, хураамж нэмэгдэж, улс орны эдийн засагт мөн хэмжээгээр дэмжлэг болох бодит боломжийг бүрдүүлсэн чухал үйл явдал болж байгаа гэдгийг томоохон уул уурхайн компаниудын удирдлагууд хэлж байсан юм. Хилийн боомтын зөвлөлөөс Гашуунсухайт боомтыг жишиг боомт болгохоор төлөвлөсний дагуу эхний ажлууд ийнхүү үр дүнгээ өгч эхлээд байна.
