Эв санааны нэгдэл үйлдвэрчний эвлэлийн дарга С.Эрдэнэ өлсгөлөн зарлаад 96 цаг болжээ. Тэрбээр "Эрдэнэс Тавантолгой" компанийн ажилчдын кемпдээ энэ сарын 20-ноос эхлэн өлсгөлөн зарласан юм. Тус компанийн В ээлжийн оператор Л.Ариунсанг хууль бусаар ажлаас нь халагдсны улмаас дөрвөн өдөр өлсгөлөн зарласан. Гэвч түүнийг суурь өвчин нь өлсгөлөнг үргэлжлүүлэх боломжгүй болгосон тул гишүүдийнхээ эрх ашгийг хамгаалж, асуудлыг шийдэх үүднээс  С.Эрдэнэ ийнхүү үргэлжлүүлэн өлсгөлөн зарлаж буй.

Гэвч өлсгөлөн зарласнаас хойш 96 цаг буюу дөрвөн өдөр болчихоод байхад Эрдэнэс Таван Толгой ХК-н удирдлагаас шаардлагын хариу албан бичгээр ирээгүй байна. Энэ талаар Эв санааны нэгдэл "Эрдэнэс таван толгой" гэх фейсбүүк хуудсанд "Гүйцэтгэх захирал Д.Ариунболд болон Тэргүүн дэд захирал Б.Ганхуяг нар нөхцөл байдалтай ирж танилцахаасаа илүүтэйгээр улс эх оронд өрнөсөн Засгийн газрыг огцруулах асуудал сонин байх шиг байна.

Сандал суудал албан тушаалаа хэрхэн авч үлдэх талаар бодохынхоо эхэнд хүний эрүүл мэнд, амь нас нэн чухал тэргүүн эгнээнд байх ёстойг ойлгож ухамсарлаарай. Одоогоор та 2 "Эрдэнэс Таван Толгой" ХК-н Гүйцэтгэх захирал, тэргүүн дэд захирал хэвээрээ байгаа болохоор асуудлыг хурдан шийдэхийг хүсэж байна" гэжээ.