НИТХ дахь МАН-ын бүлгийн төлөөлөгчид өнөөдөр мэдээлэл хийлээ. НИТХ-ын дарга Ц.Сандуйг огцруулах асуудлыг өнөөдөр хэлэлцэх байсан ч тов зарлагдахгүй байгаа учир тэд ийнхүү олон нийтэд хандах болсон байна.
Хурлын үеэр төлөөлөгчид НИТХ-ын ээлжит бус хуралдааныг есдүгээр сарын 7-ны өдөр товлон хуралдуулахыг шаардаж, НИТХ-ын 17 төлөөлөгч гарын үсэг зураад байгааг дуулгасан. Мөн НИТХ-ын төлөөлөгч С.Амарсайхан “НИТХ-ын ээлжит болон ээлжит бус хуралдаан, НИТХ-ын тэргүүлэгчид өнгөрсөн тавдугаар сараас хойш хуралдаагүй. Цаг үеийн ямар ч нөхцөлд нийслэлийн ажил тасралтгүй үргэлжилж байх ёстой. Нийслэлийн иргэдийн ажил амьдралтай холбоотой олон асуудлыг шийдэхийн тулд цаг алдах ёсгүй. Өнгөрсөн хугацаанд хийсэн ажлууддаа дүгнэлт хийх шаардлагатай байна. Өнөөдөр нийслэлд хоёр ч газар малын гоц халдварт өвчин гарч, хорио тогтоочихоод байж байна. Хичээлийн шинэ жил эхэлж байхад хорио тогтоосон бүсийн хүүхдүүдийн сургууль, цэцэрлэгийг хэрхэн шийдвэрлэхвэ? Өвөлжилтийн бэлтгэл ажил ямар шатандаа явж байгаа, одоо шийдвэрлэвэл зохих ямар ажил байна гээд НИТХ-ын төлөөлөгчид хуралдах зайлшгүй шаардлагуудыг хэлээд байвал олон зүйл бий. Тиймээс ээлжит бус хуралдааныг хуралдуулахыг бид дахин дахин шаардаж байна” гэлээ.
Дашрамд өгүүлэхэд, НИТХ дахь МАН-ын бүлгийн нэр бүхий 16 гишүүн НИТХ-ын дарга Ц.Сандуйг огцруулах өргөх бичгийг энэ сарын 17-ны өдөр хүргүүлсэн. Улмаар НИТХ дахь АН-ын бүлгийн 11 төлөөлөгч Ц.Сандуйг огцруулах асуудлыг дэмжинэ гэдгээ илэрхийлээд байгаа юм.
