Цагдаагийн байгууллагаас өнөөдөр цаг үеийн сэдвээр мэдээлэл хийлээ. Их дээд сургууль, ерөнхий боловсролын сургуулийн хичээлийн эхлэж байгаатай холбогдуулан нийслэлийн хэмжээнд гэмт хэргээс урьдчилан сэргийлэх зорилготой "Хичээлийн шинэ жил" нэгдсэн арга хэмжээ явагдаж байгаа юм. Мөн насанд хүрээгүй хүмүүсийг дээрэмдсэн бүлэг этгээдүүдийг олж тогтоон баривчилсан, бага насны хүүхдийн ахуйн осол гэмтэлд өртөж байгаа нөхцөл байдал, гэр бүлийн хүчирхийллийн гэмт хэргийн талаар мэдээллийг өглөө.

Мэдээлэлд НЦГ-ын Урьдчилан сэргийлэх хэлтсийн дарга, цагдаагийн дэд хурандаа П.Эрдэнэцэцэг, ЗЦА-ны хэлтсийн ахлах мэргэжилтэн, цагдаагийн хошууч Г.Насанжаргал, “Монголын сурагчдын холбоо”-ны тэргүүнО.Сэлэнгэ нар оролцов.

Нийслэлийн хэмжээнд 2017 оны эхний 8 сард 12807 гэмт хэрэг бүртгэгдсэн нь Улсын хэмжээнд бүртгэгдсэн нийт хэргийн 65.7 хувийг эзэлж байна. Гэмт хэргийн дийлэнх хувийг Баянзүрх, Сонгинохайрхан, Сүхбаатар, Баянгол дүүрэгт үйлдэгджээ.

2017 оны эхний 8 сарын байдлаар булаах гэмт хэрэг -54.8, хүнийг санаатай алах гэмт хэрэг 31.5, танхайрах гэмт хэрэг -32.7, тээврийн хэрэгслийн хөдөлгөөний журам зөрчих гэмт хэрэг -15.7, бусдын бие махбодид гэмтэл учруулах гэмт хэрэг -2.8, гэр бүлийн хүчирхийллийн улмаас үйлдэгдсэн хэрэг -26.3, согтуугаар үйлдэгдсэн гэмт хэрэг -24.5, хүүхэд оролцсон гэмт хэрэг -10.6 хувиар тус тус буурсан эерэг үзүүлэлттэй байна.

Гэр бүлийн хүчирхийллийн улмаас эхний 8 сард 405 гэмт хэрэг бүртгэгдсэн нь өнгөрсөн оны мөн үеэс 26,3 хувиар буурсан бол насанд хүрээгүй хүмүүсээс үйлдсэн хэрэг эхний найман сард 343 бүртгэгдсэн нь 10.6 хувиар буурчээ.