“Будапешт-2017” Дэлхийн аварга шалгаруулах тэмцээнд амжилттай оролцсон Монголын жүдо бөхийн шигшээ багийн тамирчин, дасгалжуулагчид эх орондоо ирлээ. Тэднийг жүдо бөхийн дэмжигчид, гэр бүлийнхэн нь болон харьяа байгууллагуудын удирдлагууд нь угтан авсан юм. Энэ жилийн тэмцээнд Монголын жүдочид эрэгтэй, эмэгтэй тус бүр есөн тамирчны бүрэлдэхүүнтэй оролцож, нэг алт, нэг мөнгө, дөрвөн хүрэл медаль хүртэж, шагналт тав, долдугаар байр тус тус нэгийг эзэлснээр багийн амжилтаар дэлхийн 126 орноос гуравдугаар байрт шалгарсан билээ. Дэлхийн чансааг тэргүүлж буй тамирчин Д.Сумъяа болон баг тамирчдад хүндэтгэн хүлээн авах ёслолын үеэр МУГТ дасгалжуулагч О.Балжинням тэргүүтэй хүмүүс хэвлэлийн хурал зарлаж, сэтгүүлчдэд мэдээлэл өгч сэтгэгдэлээ хувцаалцлаа.
МУГТ дасгалжуулагч О.Балжинням: Манай жүдо бөхийн үндэсний шигшээ баг найман сарын 23-наас есдүгээр сарын гуравны хооронд Унгарын Будапешт хотод болсон ДАШТ-д оролцоод ирлээ. Та бүхэн амжилтын тухай сайн мэдэж байгаа. Манай баг тамирчид нэг алт, нэг мөнгө, дөрвөн хүрэл медальтай, тав, долдугаар байр. Багын дүнгээр гуравдугаар байрны шагналтай үнэмлэхүй амжилт гаргаж эх орондоо ирлээ. Монголын түүхэнд байгаагүй түүхэн амжилт гаргаж чадлаа. Медаль авахад багш дасгалжуулагч нар, бэлтгэл хангагч нар, тамирчдын минь гэр бүл, найз нөхөд, хамаатан садан, Жүдо бөхийн холбооны хамт олонд, БСШУСЯ, Биеэн тамир спортын газар гээд маш олон хүнд талархаж байгаагаа илэрхийлмээр байна. Өнгөрсөн долоо хоногт монголын ард түмэн тэр чигээрээ биднийг дэмжиж оролцлоо. Бид бүхэн их баяртай байгаа, баярлалаа, Хамтын хүч гэдэг амжилт манай багт ажилсан эмч, массажист олон хүмүүсийн хүч хөдөлмөр орж байж энэ амжилтууд гарсан гэдгийг хэлмээр байна.
Монгол Улсын хөдөлмөрийн баатар, гавьяат тамирчин Н.Түвшинбаяр: Нийт монголынхоо ард түмэндээ жүдо бөхийн спортод хайртай та бүхэндээ баярлаж байгаагаа хэлье. Манай жүдо бөхийн уриа “Хамтын хүч, амжилт” гэж байдаг. Хамтын хүчээр энэ бүх амжилт бидэнд ирлээ. Тиймээс монголын маань бүх ард түмний хүч хөдөлмөр шингэсэн учраас ийм амжилтыг жүдо бөхийн тамирчид бид гаргалаа, ард түмэндээ баярлалаа.
Гавьяат тамирчин Д.Сумъяа: Хамгийн түрүүнд монголынхоо ард түмэнд баярлалаа гэж хэлмээр байна. Яагаад гэхээр тамирчин бид нартай давхад минь цуг давж, унахад минь хамтдаа ялагддаг. Үнэхээр чин сэтгэлээсээ хөгжөөн дэмжиж бидний ард байдаг маш их баярлалаа. Шигшээ багийн багш нартаа “баярлалаа” гэдгийг үгийг хэлмээр байна. Мэдээж тамирчин бүхний ард ар гэр, ивээн тэтгэдэг байгууллага, ах дүүс нартаа маш их баярлалаа гэдгээ хэлье. Медалиа аваад тавцан дээр зогсох тэр мөч бол хамгийн сайхан мэдрэмж байсан. Тэр мэдрэмжийг авах юмсан гэсэн нууцхан хүсэл байсан. Энэ жил түүнийгээ авч чадлаа. Баярлалаа гэж хэлмээр байна.
Гавьяат тамирчин М.Уранцэцэг: Нийт монголынхоо ард түмэнд энэ өдрийн мэндийг хүргэе, та бүхэндээ маш их баярлалаа. Ар гэр, хамаатан садан, найз нөхөд, багийнхандаа баярлалаа. Бидний энэ амжилтын ард маш их олон хүний хүч хөдөлмөр шингэсэн байдаг. Энэ хүмүүстээ, дахин дахин баярлалаа гэж хэлмээр байна.
Гавьяат тамирчин Г.Болдбаатар: Энэ жилийн ДАШТ-д манай баг тамирчид маш сайхан амжилттай оролцоод хүрэлцэн ирлээ. Багаараа алт, мөнгө, дөрвөн хүрэл медаль хүртлээ. Бид бүгдийг туслаж дэмжиж байсан гэр бүл, найз нөхөд, баг хамт олон, удирдлагууд, дэмжидэг бүх байгууллагууддаа маш их баярлалаа гэж хэлмээр байна.
ОУХМ Б.Мөнгөнчимэг: Дэлхийн аваргын тэмцээнд ороод манай баг тамирчид зургаан медаль аваад өнөөдөр эх орондоо ирж байна. Засгийн газрын хэрэгжүүлэх агентлаг, Жүдо бөхийн холбоо болон Монгол Улсын Ерөнхийлөгчдөө маш их баярлаж байна. Бэлтгэл хангаж өгсөн хамт олон болон дасгалжуулагч багш нартаа ч гэсэн баярлаж байгаа хэлмээр байна.
