Монгол Улсын Зэвсэгт хүчин, Японы Өөрийгөө хамгаалах хүчний хамтарсан “Зам” сургалт, дадлага энэ жил ус зайлуулах хоолой сэдвийн хүрээнд амжилттай болж өндөрлөв. Энэ удаагийн сургалт, дадлагад Зэвсэгт хүчний барилга, инженерийн чиглэлийн зургаан анги, байгууллагаас 30 гаруй алба хаагчийг хамруулж, ус зайлуулах хоолой барих онолын болон дадлагыг олгов. Алс хол Зэвсэгт хүчний 340 дүгээр ангийн ахлах дэслэгч Х.Тэргэлээс эхлээд Налайх дүүрэг дэх Зэвсэгт хүчний 014 дүгээр ангийн ахмад Л.Баттулга нарын 30 гаруй алба хаагч сургалт, дадлагын хүрээнд Зэвсэгт хүчний Сургалтын нэгдсэн төвийн байрлалын ойролцоо ус зайлуулах хоёр хоолойг япончуудын зааврын дор барьсан юм.
Найман хоног үргэлжилсэн сургалт, дадлагын хаалтын арга хэмжээ өнгөрсөн пүрэв гаригт болсон бөгөөд Зэвсэгт хүчний Хуурай замын цэргийн командлагч, бригадын генерал Б.Амгаланбаатар, Японы Батлан хамгаалах яамны Бодлогын газрын гадаад харилцааны асуудал эрхэлсэн ерөнхий захирал О.Изава нарын албаныхан оролцож хамтарсан сургалт өндөр ач холбогдолтой болсныг онцлон, бие биедээ баяр хүргэсэн. Тухайлбал, ноён О.Изава “Хоёр улсын харилцаа улам өргөжин тэлж байгаагийн тод илрэл бол энэхүү хамтарсан сургалт юм. Монгол цэргүүдийн суралцах арга барил сайн, гүйцэтгэл өндөр байсныг хэлэх ёстой.
Сургалт, дадлагыг бүх талаар сайн зохион байгуулсан Монгол Улсын ЗХЖШ тэр дундаа Хуурай замын цэргийн командлалд баярлалаа” гэсэн бол бригадын генерал Б.Амгаланбаатар “Техник технологийн хөгжлөөрөө дэлхийд тэргүүлэгч Япон улсын цэргийн инженерүүдийн мэдлэг туршлагаас Монгол Улсын Зэвсэгт хүчний цэргийн инженерүүд суралцах боломж олдсонд баяртай байна. Энэ сургалт Монгол Улсын Зэвсэгт хүчнээс НҮБ-ын энхийг дэмжих ажиллагаанд үүрэг гүйцэтгэх “Барилга, инженерийн рот”-ын бэлтгэлийг хангахад онцгой үүрэгтэй юм” гээд сургалт удирдан явуулсан Японы Өөрийгөө хамгаалах хүчний гурван алба хаагчид талархал, дурсгалын зүйл гардуулан өгсөн юм. Энэхүү арга хэмжээний дараа хоёр талын албаныхан болоод сургалтад хамрагдсан цэргийн алба хаагчдад ЦДБЭЧ-ын уран бүтээлчид үндэсний урлагийг илтгэсэн тоглолтоор бэлэг барьсан.
Сургалт, дадлага дууссан ч манай алба хаагчид ус зайлуулах хоолойны орчны байгууламж, зарим гүйцэтгэл ажлыг дуусгахаар үргэлжлүүлэн ажиллаж байна.
