"Эрдэнэт үйлдвэр"-ийн Ерөнхий захирал Х.Бадамсүрэн ажлаас чөлөөлөгдөх өргөдлөө өгсөн талаарх мэдээлэл цацагдаж эхэллээ. Өчигдөр Эрдэнэт үйлдвэрийн Баяжуулах фабрикийн ээлжийн дарга Ш.Мөнхбаяр, баяжуулагч Уранчимэг нарын ажилчид өнөөдөр сэтгүүлчдэд хандаж, Х.Бадамсүрэнг эрх мэдлээ хэтрүүлэн, ТУЗ-өөс батлаагүй орон тоог бий болгож, өндөр цалин хангамж өгөхөөс гадна бүтцийн өөрчлөлт нэрээр халаа сэлгээ хийсээр байгааг мэдээлсэн.
Учир нь Эрдэнэт үйлдвэрт бүтцийн өөрчлөлт хийхийг хориглосон шүүхийн шийдвэр гарсан атал хууль зөрчин, намын нэр барьсан мэргэжлийн бус хүмүүсийг томилж байгаа нь албан тушаалын наймааг бодитоор хэрэгжүүлж байна гэж тэд үзсэн юм.
Улмаар Монгол Улсын Ерөнхийлөгч Х.Баттулгад хандаж, "60 тэрбумын" гэх хууль бус ажиллагаа Эрдэнэт үйлдвэрт хэрэгжиж байгаа эсэхийг хууль хяналтын байгууллагаар шалгуулж, үнэнийг тогтооход дэмжлэг үзүүлэхийг хүссэн. Тэгвэл өнөөдрөөс ийнхүү ажлаас чөлөөлөгдөх хүсэлт гаргасан талаарх мэдээлэл цацагдаж эхэллээ. Чухам ямар учир шалтгаанаар ажлаас чөлөөлөгдөх өргөдлөө өгсөн нь одоогоор тодорхойгүй байна.
Сэтгэгдэл (8)