Монголын тээвэр холбоо, газрын тосны Үйлдвэрчний Эвлэлийн Холбооноос өчигдөр мэдээлэл хийж, Зорчигч Тээврийн Нэгтгэлийн удирдлага, санхүүтэй холбоотой зарим нэгэн баримтуудыг дэлгэсэн. Тэгвэл өнөөдөр Зорчигч Тээврийн Нэгтгэлээс тус байгууллагын үйл ажиллагаатай холбоотой гарч буй мэдээлэлд тайлбар нь ташаа болохыг мэдэгдэж, хууль шүүхийн байгууллагад хандана гэлээ.
Энэ талаар Зорчигч тээврийн нэгтгэлийн орлогч захирал Б.Даваасүрэн “Өчигдрийн хэвлэлийн хурлын үеэр манай байгууллагын үйл ажиллагаа, хувь хүнтэй холбоотой буруу ташаа мэдээлэл өгсөн тул үнэн бодит мэдээлэл өгөхөөр энэ хэвлэлийн хурлыг хийж байна. Орон тоо, бүтэц зохион байгуулалттай холбоотой асуудлууд Нийслэлийн Засаг даргын баталсан захирамжаар ажиллаж байгаа. Тодруулбал нэгтэл болохоос өмнө гурван бааз байхад 1705 ажилтан байсан. Харин одоо ЗТН болсноор 1590 ажилтантай орон тоогоо бууруулан ажиллаж байна.
Ажилтнуудыг хууль бусаар ажлаас халдаг нь ч мөн гэдэг ташаа мэдээлэл. Бид сахилгын зөрчил гаргасан, удаа дараа зөрчил гаргасан хүмүүсийг дотоод журам, хөдөлмөрийн хуулийн дагуу байгууллагынхаа хурлаар оруулан шат дараалсан арга хэмжээ авдаг, халдаг.
Цалинтай холбоотойгоор нийслэлээс баталсан цалингийн журмыг хэрэгжүүлдэг. II, III баазын ажилтнуудын цалин 30 хувиар өссөн.
2009 оноос хойш парк шинэчлэл хийгдээгүй учраас бүх тээврийн хэрэгсэл хуучирсан. Тиймээс бид сэлбэг запасыг дотоодын зах зээлээс хангадаг. Бөөнөөр нь авдаггүй, өдөр тутмын шаардлагатай сэлбэгийг авч тээврийн аюулгүй байдлыг ханган ажиллаж байгаа.
2017 оны дөрөвдүгээр сард нэгдсэн Үйлдвэрчний Эвлэлтэй болох санал гаргаснаар ажилтнууд хуралдан байгуулж, өнөөдөр үйл ажиллагаа нь хэвийн явж байна. Зорчигч тээврийн нэгтгэл 1,590 ажилтантай. Үүний 1,320 нь ҮЭ-ийн татвараа төлөөд, үйл ажиллагаа нь хэвийн явагдаж байна” гэлээ.
Хуулийн зөвлөх Ц.Баясгалан "Өчигдөр буюу есдүгээр сарын 19-нд зарим хүмүүс нийгэмд буруу ташаа мэдээлэл өгсөнд харамсаж байна. Хэвлэлийн хурлаар II, III баазын ҮЭ-ийн дарга нарыг хууль бусаар ажлаас халсан гэсэн мэдээлэл хийсэн. II баазын ҮЭ-ийн дарга өөрийн хүсэлтээр ажлаа өгсөн. III баазын ҮЭ-ийн хороон даргыг өвчтэй байх хооронд хууль бусаар ажлаас халсан гэсэн мэдээлэл өгсөн. Тэрбээр зургаадугаар сарын 3-наас долоодугаар сарын 26-ныг хүртэл нийт 54 хоног хүндэтгэн үзэх шалтгаангүй тасалсан учраас захирлын тушаал гарч ажлаас халсан. Болорсүх гэдэг хүн нь манай байгууллагад ажиллаж байсан мэргэжлийн инженер хүн. Байгууллагын удирдлагууд мэргэжлийнхээ чиглэлээр ажиллах саналыг түүнд удаа дараа тавьж байсан. Гэвч энэ хүн эрүүл мэндийн шалтгаанаар ажлаас өөрийн хүсэлтээр чөлөөлөгдсөн байгаа” гэдгийг дуулгасан.
Харин Зорчигч тээврийн нэгтгэлийн эдийн засагч н.Батболд “Нэгтгэл болсноор гурван баазын алдагдал буурч байгаа. Тухайлбал 2016 оны хагас жилийг бодвол 2017 оны хагас жилд 700 сая төгрөгөөр алдагдлыг бууруулж, зардал хэмнэж ажилласан. Санхүүгийн хуримтлагдсан өр төлбөр 6.2 тэрбум төгрөг байсныг үе шаттайгаар бууруулан ажиллаж байна. Цаашид бууруулна. Нэгтгэл болсноор гурван баазын цалингийн журам нэгдэж, цалин ижил түвшинд очсон. Цалин ямар нэгэн байдлаар буураагүй гэдгийг би хариуцлагатайгаар мэдэгдэж байна. Манай байгууллагын гол зардал бол шатахууны зардал. 2017 онд нээлттэй тендер сонгон шалгаруулалтаар шатахуунаа худалдан авснаар 2017 онд литр тутамд 200 төгрөг, жилд 1 тэрбум гаруй төгрөгийг хэмнэж ажиллах тооцоо гарсан” гэв.
Түүнчлэн өчигдөр хэвлэлийн хурлын үеэр мэдээлж байсанчлан тралейбусны сэлбэг хэрэгсэл 100 айл дээр зарагддаггүй. Энэ мэт хэн ч итгэхгүй зүйлээр хурал мэдээлэл хийж, байгууллага болоод хувь хүмүүсийн нэр төрд халдвал хуулийн байгууллагад хандах болно гэдгээ мэдэн онцолж байлаа.
Сэтгэгдэл (1)