Авлигатай тэмцэх газар, Европын аюулгүй байдал, хамтын ажиллагааны байгууллага хамтарч прокурорууд, авлигатай тэмцэх болон цагдаагийн байгууллагын мөрдөгч нар, мөн төв банкны албан хаагчдад зориулан зохион байгуулсан “Олон улсын болон үндэсний хэмжээнд авлига, мөнгө угаах явдалтай тэмцэх нь” сургалт Авлигатай тэмцэх газарт хоёр өдөр болж өндөрлөв.

Сургалтаар авлигын гэмт хэргийг мөрдөн шалгах, яллахтай холбоотой олон улсын стандарт, зарчмууд, заавар зөвлөмж, авлигын гэмт хэргийн улмаас олсон ашгийг хураан авахтай холбоотой дотоодын болон олон улсын зохицуулалтыг зөв ашиглах, хууль бус хөрөнгийг олж тогтоон, буцаан авчрахтай холбоотой олон улсын хамтын ажиллагааг зохион байгуулах, санхүүгийн болон авлигын гэмт хэрэгтэй тэмцэхтэй холбоотой хамтын ажиллагааны эрх зүйн орчин, практикийн асуудлууд, ялтан шилжүүлэх, хөрөнгийг буцаан авах ажиллагаа, эрх зүйн туслалцааны хүсэлт боловсруулахад бэлтгэх, нээлттэй эх сурвалжаас мэдээлэл цуглуулах зэрэг сэдвүүдээр ярилцаж, мэдээлэл солилцлоо.

Европын аюулгүй байдал, хамтын ажиллагааны байгууллагын Эдийн засгийн зөвлөх, ноён Роел Жансенс сургалтын төгсгөлд хэлэхдээ Монгол Улс оффшор бүсийн асуудлаар тодорхой санал санаачилга гарган ажиллаж байгааг тэмдэглэсэн юм. АТГ-ын дарга, тэргүүн комиссар Х.Энхжаргал сургалтыг хааж хэлсэн үгэндээ “Авлигатай тэмцэх үйл хэргийг олон нийтийн хяналтад оруулж, тэдний тусламжтайгаар бусад хөгжингүй орны түвшинд хүргэх томоохон зорилтыг бид өмнөө тавиад байна. Үүний дагуу бид өнгөрсөн онд Авлигатай тэмцэх үндэсний хөтөлбөрийг батлуулсан. Цаашид бид “Зүүн өмнөд Азийн бүсийн сургалтын төв” байгуулахаар ажиллаж байна. Энэ талаар Авлигын эсрэг академи дэмжиж хамтран ажиллахаа илэрхийлснийг энэ дашрамд онцлож байна. Эдгээр томоохон зорилтуудын маань анхны алхам, эхлэл нь энэ сургалт болж, энэ үйл хэргийн төлөө бид нэгдмэл байж хамтдаа тэмцэх юм шүү гэдгээ ярилцаж тогтлоо. Сургалтаар олж авсан мэдлэг, мэдээллээ цаашид бодит, үр дүнтэй ажил хэрэг болгохын төлөө АТГ-ын албан хаагчид чармайж ажиллана” гэлээ.