“Багшийн цалин нэмэх түр хороо”-ноос өчигдөр дахин сануулах ажил хаялт зарласан билээ. Тэд Засгийн газарт цалинг 1.6 сая төгрөг хүртэл нэмүүлэх шаардлага тавиад байгаа юм. Үүний хариуд Засгийн газраас үе шаттай 30 хувь нэмэхээр ажиллаж байна гэсэн хариу ирүүлсэн боловч багш нар уг саналыг хүлээж аваагүй юм.

Өмнөх ажил хаялтад нийслэлийн ЕБС 43 хувьтай, сургуулийн өмнөх боловсрол 28 хувьтай, улсын хэмжээнд ЕБС 56 хувь, сургуулийн өмнөх боловсрол 23 хувьтай оролцсон бол өчигдрийн ажил хаялтад улсын хэмжээнд ЕБС 90 хувь, сургуулийн өмнөх боловсрол 23 хувьтай оролцжээ.

“Багшийн цалин нэмэх түр хороо”-ноос  Засгийн газраас ямар нэгэн дорвитой шийдвэр өгөхгүй тул нэлээд өргөн хэмжээний жагсаал цуглаан хийхээр бэлтгэж байгаа мэдэгдлээ. Тэд ирэх 10 дугаар сарын 5-ны өдөр Сүхбаатар талбайд хот хөдөөгийн 3000 гаруй багш нарыг хамарсан жагсаал хийх гэж байгаа аж. Үүгээр зогсохгүй ирэх сарын 10-ныг хүртэл Засгийн газар багш нарын шаардлагыг хүлээн авахгүй бол хугацаагүй ажил хаялт зарлана гэдгээ мэдэгдлээ.