Тусгай дуут дохиотой 17-93 УБҮ дугаарын автомашины жолооч үүргээ гүйцэтгэж явсан цагдааг хэл амаар доромжилж буй бичлэгийг манай сайт хүргэсэн билээ. Тус бичлэгт машины жолооч цагдаагийн шаардлагыг биелүүлэхээс татгалзаж, салаавч гарган танхайрч байгаа юм.

Үйл явдлыг сийрүүлбэл 17-93 УБҮ улсын дугаартай “Ланд 200” маркийн машиныг замын цагдаа дохиж зогсоон, машин болон  жолоочийн бичиг баримтыг шалгажээ. Улмаар дуут дохионы тусгай зөвшөөрлийг нь шалгахад машинд зорчиж явсан иргэн бууж ирэн, үүргээ гүйцэтгэсэн цагдаа руу салаавч гаргаж, танхайрсан байна. Учир нь тэрбээр дуут дохионы зөвшөөрөл нь зөрчилтэй байжээ.

 Тэгвэл танхайрсан тухайн иргэнийг Сүхбаатар дүүргийн цагдаагийн I хэлтэст хэрэг үүсгэн шалгаж эхэлснийг Замын цагдаагийн албанаас мэдээлж байна.

Мөн иргэний энэ үйлдэлд хуулийн хариуцлага тооцно гэдгийг хуульзүйн салбарын удирдлагууд өөрийн цахим хуудсаараа дамжуудсан мэдэгдлээ. Хуульзүйн сайдын үүрэг гүйцэтгэгч С.Бямбацогт "Төрийн цагдаа ингэж доромжлохгүй шүү" хэмээн хуулийн дагуу арга хэмжээ авахаа хэлсэн бол Хууль зүйн дэд сайд Б.Энхбаяр "Зөвшөөрөлгүйгээр тусгай дуут дохио тээврийн хэрэгсэлдээ суулгасан энэ этгээд ББСБ-ынх бололтой" хэмээж, хууль мэдрүүлэхээ цахим хуудсаараа дамжуулан мэдэгдсэн байна. 

Зарим нэг хэвлэлийн мэдээлж байгаагаар энэхүү танхайрагч залуу нь Хөвсгөл аймгаас сонгогдсон УИХ-ын гишүүн Л.Мөнхбаатарын дүү, "Эко Капитал" ББСБ-ийн захирал Л.Баяртогтох гэх ч яг баттай эсэх нь тодорхойгүй байна.

24tsag.mn