АНУ-ын Индиана мужид оршин суудаг Мэри Хеллер гэх эмэгтэй 15 настай монгол болон 19 настай хятад охидыг гэрийн хорионд олон жил байлгасан талаар манай сайт хүргэсэн юм. Хэргийг 2017 оны нэгдүгээр сараас шалгаж эхэлсэн бөгөөд одоогоор Мэри Хеллер шоронд, охид Индиана мужийн Хүүхэд хамгааллын газарт газарт байгаа юм.

Эх сурвалжийн мэдээллэснээр “15 настай Монгол охин тун туниа муутай, туранхай. Гэрээс гарч үзэлгүй 10-аад жил болчихсон. Тэднийг хорьж байсан Мэри Хеллер гэгчийн бие нь муудан эмнэлгийн түргэн тусламж дуудаж, эмч нар гэрт нь ирэхэд хүнтэй мэндэлж ч мэдэхгүй, туранхай хоёр охин бохир заваан, тааруухан орчинд байсан тул цагдаад мэдэгдэж энэ хэрэг олны анхаарлын төвд орсон” гэжээ.

Тэгвэл Гадаадын иргэн харьяатын газрын Харьяатын газраас АНУ-д хорионд байсан охин монгол хүүхэд биш гэв. Тус газрын Харьяатын газрын дарга Б.Хатантуул "2001 оноос хойш Монгол Улсын харьяат хүүхдийг гадаадын иргэнд үрчлүүлж эхэлсэн байгаа. АНУ-д үрчлэгдсэн бүх хүүхдийн мэдээлэл болоод үрчилж авсан эцэг эх, асран хамгаалагчийн мэдээлэл манайд байдаг. Дээрх мэдээлэлд нэр дурьдагдаад буй АНУ-ын Мэйри Хэллэр гэх иргэн Монгол Улсын харьяат хүүхдийг үрчилж авсан бүртгэл уг мэдээллийн санд байхгүй" гэсэн байна.