Сэлэнгэ аймгийн Эрүүгийн хэргийн анхан шатны шүүхэд өнөөдөр иргэн Ц.Баярцогтод холбогдох хэргийн шүүх хурал болжээ. Түүнийг тусгай хамгаалалттай газарт хууль бусаар хайгуул, олборлолт явуулж, байгальд хохирол учруулсан хэрэгт холбогдуулан шүүх байсан ч шүүх бүрэлдэхүүн Ц.Баярцогтын өмгөөлөгчдөөс гаргасан хавтаст хэрэгтэй танилцах хүсэлтийг хүлээн авч, хурлыг арваннэгдүгээр сарын 9-ний 10:00 цаг хүртэл хойшлуулжээ.

Өмнө нь аравдугаар сарын 5-нд товлогдсон түүнд холбогдох хэргийн шүүх хурал өмгөөлөгч ирээгүй шалтгаанаар хойшилсон билээ. Энэ удаа тэрбээр өмгөөлөгчөө сольсон тул хоёр шинэ өмгөөлөгч нь хавтаст хэрэгтэй танилцах хүсэлт гаргасан аж.

Шүүх бүрэлдэхүүн Ц.Баярцогтыг батлан даалтад гарган, Улаанбаатар хот болон Сэлэнгэ аймгаас өөр газарт зорчихыг хориглосон шийдвэр гаргажээ. Тун удахгүй Ц.Баярцогтыг гудамж талбайд танхайрч, үүргээ гүйцэтгэж явсан замын цагдаа руу салаавч гаргасан гэх үйлдлээр нь шүүх мэдээлэл байна.