Улаанбаатар хот утааны, өмхийний гэсэн хоёрхон улиралтай болоод удаж буй. Энэ асуудал үе үеийн Засгийн газар, төр солигдох бүрт яригдаж, асуудал хөнддөгддөг ч өнөөдрийг хүртэл дорвитой арга хэмжээ аваагүйгээс болж Улаанбаатарчууд өмхий, утаа хоёртоо дарлуулан амьдарч байгаа нь нууц биш. Тэгвэл дээрх асуудалд шинэ Засгийн газар хамцуй шамлан орохоор болжээ.

Тодруулбал Монгол Улсын Ерөнхий сайд У.Хүрэлсүх өчигдөр Төв цэвэрлэх байгууламжийн үйл ажиллагаа, нөхцөл байдалтай танилцаж, асуудал хариуцсан хүмүүст зарим үүрэг даалгаврыг өгөв. Энэ үеэр Ерөнхий сайд “2013, 2015 онд төслүүд хийгдсэнээс хойш нөхцөл байдал эрс өөрчлөгдсөн учир шинээр ТЭЗҮ-ийг гаргаж, Төв цэвэрлэх байгууламжийг шинэчлэх ажлыг яаралтай эхлүүлэх нь чухал. Энэ асуудал дээр Мянганы сорилтын корпорацитай хамтран ажиллах болно. Манай Засгийн газар бүрэн эрхийнхээ хугацаанд төв цэвэрлэх байгууламжийн асуудлыг шийдвэрлэнэ. Төслөөс сонголт хийж, хэрэгжүүлэхэд шаардагдах санхүүжилт босгох арга замыг эрэлхийлнэ. Одооноос бэлтгэл хангаж, Олон улсын тендерийг энэ ондоо багтаан зарлаж шалгаруулалт явуулж ирэх хавар гэхэд барилга гүйцэтгэлийн ажлыг эхлүүлэх боломжтой болно. Монгол Улсын эрх ашиг Монгол хүний эрүүл мэнд, Үндэсний аюулгүй байдал нэгдүгээрт байх ёстой” гэв.

Олон жил дуншиж буй цэвэрлэх байгууламжийг шинэчилж, Улаанбаатарыг өмхийнөөс салгах ажлыг У.Хүрэлсүхийн Засгийн газар толгойгоороо хариуцан хийхээр болсон гэдгээ дуулгав. Хэрэв тэд хэлсэндээ хүрэгүй бол "толгойгүй" болно.

Ямартай ч олон жил дуншиж буй цэвэрлэх байгууламжийг шинэчилж, Улаанбаатарыг өмхийнөөс салгах ажлыг У.Хүрэлсүхийн Засгийн газар толгойгоороо хариуцан хийхээр болсон гэдгээ ийнхүү дуулгав.

Харин тэдний эдгээр хэлж, хийж хэрэгжүүлэхээр төлөвлөж буй ажил нь өмнөх Засгийн үеүүд шиг зүгээр нэг яригдаж, цаасан дээр үлддэг байсан жишгийг эвдэж, ажил хэрэг болоосой гэдгийг олон нийт хүсч, басхүү шаардаж байгаа юм. Төв Цэвэрлэх байгууламжийг шинэчлэх ажил хэзээнээсээ “эзэнгүй” явж ирсэн. Яам Тамгын газар, нийслэл гээд төр захиргааны байгууллагууд өөр хоорондоо шидэлцэхээс дорвитой шийдэлд хүрч байсан удаагүй. Харин одоо уг ажлыг Барилга хот байгуулалтын сайд А.Баделханд хариуцуулахаар болсон нь басхүү нэг дэвшил. Түүнийг цэвэрлэх байгууламжийн шинэчлэлийн ажлыг хар толгойгоороо хариуцан хийж, гүйцэтгэх учиртай ч Ерөнхий сайд анхааруулсан.

Ерөнхий сайд У.Хүрэлсүх анх ажил авахдаа “Төрийн ордонд зураг нь өлгөгдөх төдийхнөөр дурсагдах Ерөнхий сайд байхыг хүсэхгүй байна” гэдгээ хэлж байсан. Тэгвэл У.Хүрэлсүхийн Засгийн газар цэвэрлэх байгууламжийг шинэчилж, Улаанбаатарыг өмхийнөөс салгаж дөнгөвөл тэд үнэхээр ард түмний алга ташилтыг хүртэж, ёстой л Ерөнхий сайдын хэлсэнчлэн  Төрийн ордонд зураг нь өлгөгдөх төдийхнөөр дурсагдах Ерөнхий сайд биш гэдгээ батлан харуулах нь тодорхой юм.

Ирэх хавар эхлүүлнэ гэх цэвэрлэх байгууламжийн шинэчлэлийн ажил хэрхэн урагшлах, Улаанбаатар өмхийнөөс хэзээ салах эсэх нь У.Хүрэлсүхийн кабинетийн ажил дүгнэгдэх бас нэгэн шалгуур болохоор боллоо. 

24tsag.mn