Төмөр Замчдын Мэргэжлийн холбоодоос өнөөдөр Монголын Төмөр Замын нэгдсэн холбооны тэргүүн Ч.Сүрэнхорлоогийн явуулж буй үйл ажиллагааг эсэргүүцэж мэдээлэл хийлээ. Монголын вагоны мэргэжилтнүүдийн холбооны тэргүүн Л.Болд “Төмөр зам бол олон мэргэжил дээр үйл ажиллагаа явуулдаг цогц байгууллага. Мэргэжил бүрийг хөгжүүлье гэсэн хүмүүсийн нэгдсэн холбоодоос бүрддэг. Энэ холбоод 2015 оноос нэгдсэн холбоо болъё гэж ярилцаад, Монголын төмөр замын нэгдсэн холбоонд нэгдсэн. Төмөр замын нэгдсэн холбоо анх байгуулагдахдаа долоон холбооноос бүрдсэн. Өнөөдөр таван холбоо нь гарахаар болж байна.

Байгуулагдсанаасаа хойш хоёр жилийн хугацаанд Монголын төмөр замын нэгдсэн холбооны тэргүүн Ч.Сүрэнхорлоо бидэнтэй уулзаж, ажил мэргэжлийн талаар ярьж, ажил мэргэжил хөгжүүлэх талаар дорвитой бодлого боловсруулж, холбоод руугаа чиглэсэн үйл ажиллагаа явуулахын оронд бидний өмнөөс шийдвэр гаргаж, бидэнтэй хуралдаж шийдээгүй асуудлуудаа хэвлэл мэдээллийн хэрэгслүүдээр удаа дараа ярьж, мэдэгдэж, төмөр замын үйл ажиллагааны талаар олон нийтэд буруу ташаа ойлголт төрүүлж байна. Тийм учраас Төмөр замын нэгдсэн холбоонд оролцдог бид энэ холбооноос гаръя, тус тусынхаа үйл ажиллагааг цаашдаа авч явцгаах болно гэдгээ олон нийтийн мэдээллийн хэрэгслээр дамжуулж мэдэгдэх гэсэн юм.

Аж ахуй нэгжийн дотоод үйл ажиллагаанд холбогдолтой хэд хэдэн мэдэгдэл хэвлэл мэдээллийн хэрэгслээр гарч байсныг та бүхэн мэдэж байгаа байх. Холбоод анх гишүүдийнхээ эрх ашгийн төлөө нэгдсэн. Гэтэл одоо үйл ажиллагаа нь улс төрийн шинжтэй, хэдэн хүний амбицын байгууллага болчихсон. Шантааж хийж, албан тушаал олж авдаг, гишүүдийнхээ эрх ашгийн төлөө үйл ажиллагаа явуулдаггүй. Элдэв долоон албан тушаалын хойноос явах сонирхол бидэнд байхгүй. Нэгдсэн холбооны дүрэмд гишүүдийн гуравны хоёр нь холбооноос гарсан тохиолдолд нэгдсэн холбооны үйл ажиллагаа хүчингүй болох ёстой. Тиймээс манай таван холбоо гарснаар Төмөр замын нэгдсэн холбоо эрхзүйн чадамжгүй болж байна гэж ойлгож болно.

Монголын вагоны мэргэжилтнүүдийн холбооны хувьд вагоны мэргэжлээр үйл ажиллагаа явуулж байгаа аж ахуйн нэгж байгууллага, иргэдэд зөвлөгөө өгөх, хамтран ажиллах үүрэг чиглэлтэй. Энэ чиглэлийн үйл ажиллагаа цаашдаа үргэлжлүүлэн явуулна. Одооноос Төмөр замын нэгдсэн холбооноос гаргасан аливаа мэдэгдэл, мэдээлэл бол Манай вагоны мэргэжилтнүүдийн холбоонд огт хамаагүй болж байна" гэв. 

Монголын Төмөр Замын Нэгдсэн холбоо нь анх байгуулагдахад 7 холбоо нэгдэж байсан бол өнөөдөр Төмөр замын эрчим хүч, усны инженерүүдийн холбоо, Монголын вагоны мэргэжилтнүүдийн холбоо, Монголын төмөр замын тээвэр зохион байгуулалтын инженерүүдийн холбоо, Монголын зүтгүүрийн инженер мэргэжилтнүүдийн холбоо, Москвагийн төмөр замын их сургууь төгсөгчдийн холбоо тус холбооноос гарахаа ийнхүү илэрхийллээ.