Монголчуудын нүүдэлчин ахуй, биет бус соёлын өвийг хадгалах, сурталчлан таниулах зорилго бүхий “Талын түмэн адуу” арга хэмжээ ирэх сарын 04-05-нд Хэнтий аймгийн Батноров суманд болно. Энэ нь Монгол Улсад өвлийн аялал жуулчлал хөгжүүлэх, өвөл адуу маллах эртний нүүдэлчин өв уламжлалыг хадгалан үлдэх, тухайн орон нутгийн адуучдын авьяас чадварыг алдаршуулах зэрэг чухал ач холбогдолтой юм. 2015 оноос  “Мөнх Харилцаа” ТББ-аас санаачлан жил бүр зохион байгуулж буй энэхүү арга хэмжээнд улс, аймгийн цолтой уяачид, залуу адуучдын 2000 адуу нэг дор цуглах юм. Мөн ӨМӨЗО-ны таван адуучин оролцох гэж буй нь энэ жилийн “Талын түмэн адуу” арга хэмжээны онцлог болж буйг зохион байгуулагчид  хэллээ.

   Арга хэмжээний хүрээнд “Торгон тар” богино зайн бооцоот уралдаан, нутаг усандаа алдартай хурдан адууны танилцуулга, адууны зүс нэршлийн танилцуулга, ховор зүсмийн адууны цуваа, уурга шүүрэх, эмнэг булгиулах зэрэг тэмцээн уралдаан болно. Мөн жуулчдад зориулан малчдын өвөлжөөтэй танилцах аялал зохион байгуулж, адууны тоноглол, дархан урлагийн үзэсгэлэнг нээх юм.

   Хэнтий аймаг нь Их эзэн Чингис хааны өлгий нутаг тул аялал жуулчлалыг хөгжүүлэх хамгийн өндөр боломжтой. Тус аймгийн 13 жуулчны баазад 2016 онд дотоодын 15 мянга 855, гадаадын 1500 жуулчин аялсан гэсэн судалгааг холбогдох албаныхан гаргасан бөгөөд энэ нь өмнөх жилээсээ есөн хувиар өссөн үзүүлэлт аж.  Тиймээс энэ үзүүлэлтийг улам бүр нэмэгдүүлэх Батноров болон зэргэлдээх сумдын малчдын амьжиргаа, эдийн засгийн эргэлтийг дэмжих үүднээс “Мөнх Харилцаа” ТББ-аас дээрх арга хэмжээг зохион байгуулж буй юм.