“Хүрэл тогоот-2017” оны шилдэг бүтээл шалгаруулах эрдэм шинжилгээний бага хурал энэ сарын 4-ны өдөр Хүрэл тогоот дах Одон орон судлалын төвд боллоо.

БСШУСЯ, Шинжлэх ухаан, технологийн сан, Монголын Залуу эрдэмтдийн холбоо, Нийгмийн шинжлэх ухааны Залуу эрдэмтдийн холбоо, Нийслэлийн Залуучуудын хөгжлийн газраас хамтран зохион байгуулсан энэхүү хурал нь 12 дахь жилдээ болж байгаа юм. 

Уг хурлын хүрээнд Нийгмийн шинжлэх ухааны салбарын 50 гаруй илтгэл ирүүлснээс 23 илтгэлийг шалгаруулан эмхтгэл болгон гаргаж, түүнээс 14 илтгэлийг хэлэлцүүлсэн байна.

Тус хуралд Их сургуулийн Эрдэм шинжилгээ, хөгжлийн хүрээлэнгийн Цагдаа судлалын төвийн эрдэм шинжилгээний ахлах ажилтан, докторант, цагдаагийн хошууч Б.Мөнхдорж “Хорих ялыг дүйцүүлэн хасаж тооцоход математик, статистикийн аргачлал хэрэглэсэн нь” сэдвээр хийсэн судалгааны үр дүнгээ хэлэлцүүлж,  шилдэг хоёр судлаачийн нэгээр шалгарч, БСШУССайдын “ГРАНТ” авах батламж, Нийслэлийн Залуучуудын хөгжлийн газрын шагналыг тус тус хүртлээ.

Тус хурал нь Монгол Улсын шинжлэх ухаан, технологийн салбарын залуу эрдэмтэн, судлаач нарт судалгааны үр дүн, бүтээлээ хэвлүүлэх боломж олгох, улмаар дэмжлэг авах, шинжлэх ухааны салбарын хүний нөөцийг чадавхижуулах, эрдэмтдийн залгамж халааг бэлтгэх, дэлхийн хэмжээний шинжлэх ухаан, технологийн нээлт гаргах үйл явцыг дэмждэг үндэсний хэмжээний үйл ажиллагаа юм байна.

Монголын Залуу эрдэмтдийн холбоо нь Байгаль, Хөдөө, аж ахуй, биотехнологи, Анагаах, Нийгэм, Технологи, инноваци, Геодизи, газар зүй, Эдийн засаг, бизнесийн 7 салбар шинжлэх ухаанаар эрдэм шинжилгээний бага хурал 2017 оны 10-11-р сард зохион байгуулагдсан ба эдгээр 7 салбарын ЭШБХ бүрээс шилдэгээр шалгарсан 2 судлаачдад БСШУСЯ-ны сайдын ГРАНТ-ыг олгохоор шийдвэрлэж эрдэмтэн, судлаачдын оюуны бүтээлийг өндөрөөр үнэлсэн чухал ач холбогдолтой хурал боллоо.