Нийгэм даяар дуулиан тариад байсан мүүний шашны гаж урсгалыг дэлгэрүүлсэн, эс дэлгэрүүлсэн гэх маргааны эзэд гэгддэг “Цэрэнтурс” компанийн захирал Э.Цэрэндолгор, БСШУЯ-ны Стратеги, бодлого зохицуулалтын газрын дарга асан Б.Насанбаяр нар шүүхдэлцээд багагүй хугацаа өнгөрч байгаа билээ.

Хэдийгээр энэ хэрэг шат шатны шүүхэд хэлэлцэгдэж хэрэгсэхгүй болж байсан ч Б.Насанбаяр бууж өгөхийг хүсээгүй. Тэгвэл тус хэргийг өнөөдөр Дээд шүүх хэлэлцэж, нэхэмжлэгч талын гомдлыг хэрэгсэхгүй болгосон байна. Энэ талаар Э.Цэрэндолгор өөрийн цахим хуудаснаа “Мүүний гаж урсгал гэж нийгэмд сэрэмжлүүлснээс хойш Б.Насанбаярын нэр төрд халдсан гэх нэхэмжлэлтэй шүүх хэргээр 3 жил дамжин хариуцагчаар татагдан явлаа.

Анхан шатны шүүх, давж заалдах шүүхээр гомдлыг хэрэгсэхгүй болгосон ч нэхэмжлэгч тал дээд шүүхэд гомдол гаргасан. Өнөөдөр дээд шүүх нэхэмжлэгч талын гомдлыг хэрэгсэхгүй болгов. 3 жил ажил амьдралаас минь хулгайлсан энэ хэрэг ингээд төгсгөл боллоо. Зурган дээрхи 2 бүсгүй шүүх процессыг ажиглахаар, намайг дэмжихээр ирсэн болно. Миний төлөө сэтгэл зовнисон бүхэнд баярлалаа. Надад өмгөөлөл зүйн туслалцаа үзүүлсэн Монголын байгаль орчны төлөөх хуульчдын холбооныхонд баярлалаа! 2017.11.07” гэжээ.