"Парадайз пейпэрс" хэмээн нэрлэгдсэн 120 гаруй улстөрчдийн оффшор дансны материалыг багтаасан 13.4 сая баримт бичгийг Эрэн сурвалжлах сэтгүүлчдийн олон улсын консерциум (ICIJ)-аас дэлгэсэн нь шуугиад тариад байна. Учир нь Парадайз пейпэрсийн баримтуудын дийлэнхийг Бермудагийн "Appleby" гэх хуулийн компаниас гаргасан аж. Баримтуудад АНУ-ын Ерөнхийлөгч Д.Трампын танхимын гишүүд, зөвлөх, ивээн тэтгэгч нараас гадна ОХУ-ын Ерөнхийлөгч В.Путинын хүргэнтэй холбогдох материал, Их Британийн Хатан хаан II Элизабет гэхчилэн олон хүний оффшор дансан дахь хөрөнгийн мэдээлэл дэлгэгджээ.

Тэгвэл Хонконгийн хэвлэлд гарсан тус улсын нэртэй бизнесмэнтэй холбоотой баримт Монгол улсын хоёр ч компанитай холбогдсон нь анхаарал татаад байна.

Хонконгийн эрэн сурвалжлах багийн мэдээлж байгаагаар Хятадын нэрт жүжигчин буюу бидний мэдэх "Хуанжу Гэг" кинон гол дүрийн жүжигчин Жао Вэйнгийн нөхөр Хуанг Юолонг нь оффшор компаниар дамжуулан Монгол дахь компанид 70 гаруй сая долларын хөрөнгийг 2011 онд оруулжээ.  Хуанг Юолонгийн эзэмшлийн Монголын компани нь “Мизү” ХХК бөгөөд уг компани нь “Монгол туургатны зуун эрхэм” нэвтрүүлгийн продюссер асан П.Анужингийн экс нөхрийнх аж. Цементийн үйлдвэрлэл эрхэлдэг тус компани мөн нэлээд олон тооны лицензтэй бөгөөд  Ашигт малтмал, газрын тосны газрын мэдээллийн санд бүртгэгдсэнээр тус компани нь 2008 оны 5 дугаар сарын 7-ноос хойш Ашигт малтмалын тусгай зөвшөөрөл эзэмшиж байгаа бөгөөд нийт 3941.47 га талбай эзэмшдэг юм байна. Одоогоос гурван жилийн өмнө “Мизү” ХХК нь Дорноговь аймгийн Айраг суманд Алаг толгой, Цагаан-Өндөр уул, Цагаан-Чулуут зэрэг газарт тусгай зөвшөөрөл эзэмшиж байсан бол Хадан-Ус гэх талбайд 2039 он хүртэл ашиглалтын тусгай зөвшөөрөл эзэмшигчээр бүртгэгджээ. 

П.Анужин бол Ерөнхийлөгч Х.Баттулгатай нэлээд ойр байдаг хүмүүсийн нэг. Х.Баттулга Ерөнхийлөгч болсоныхоо дараа оффшор бүсэд данстай улстөрч, бизнес эрхлэгчдийг хөрөнгөө татаж, эх орондоо оруулж ирэхийг уриалж 49 хоногийн хугацаа өнгөрч байсан билээ. Энэ хугацаанд ганц эрхэм хөрөнгөө татсан нь “НИК”-ийн ТУЗ-ын дарга Ч.Давааням. Тэрбээр 4,3 сая ам доллараа оруулж ирсэн нь тус татваргүй бүсэд хэр их хэмжээний хөрөнгө нуугдаж байгааг харуулсан ч бусад  иргэд өнөөг хүртэл хөрөнгөө нуусаар байгаа юм.

Өнгөрсөн хугацаанд  “Монгол туургатны зуун эрхэм” нэвтрүүлэг хэнийх вэ гэдэг асуулт байс гээд л тавигдаж ирсэн. Нэг удаа энэ талаар П.Анужин ““Чухал 100” нэвтрүүлгийнхээ хөтлөгч хийх саналыг “Hero entertainment” надад тавьсан юм. Нэвтрүүлгийн анхны санаа нь сонгуульд зориулсан улс төрийн ток шоу байсан. Хамтран ажиллах саналыг хүлээж авсныхаа дараа бодож байгаад түр зуурын богино хугацааны уран бүтээл хийхээс илүүтэй утга гүн, үлдэц их нэвтрүүлэг хийе гэсэн саналыг тэдэнд зөрүүлэн тавьсан. Монгол түмэн маань гэгээтэй бахархалтай юмаар дутаж, оюун санаа нь гундаж мохоод байна уу даа гэсэн зовнил байнга миний толгойд эргэлддэг байлаа. Ер нь бид дотроо байгаа, өөрсөд дундаа байгаа сайн сайхныг нэрлэж, мундаг сайн хүмүүсээ хүлээн зөвшөөрч чадахаа байгаа юу даа гэсэн эмзэглэл төрөх болоод байсан юм. Бид өмнөх түүхээ мэдэж, бас энэ үеэ таньж байж л ирээдүйгээ алдаа оноо багатай бүтээнэ шүү дээ. Тэдний дотоод хүн, хүсэл зорилго юу байдаг юм, тэд юуг санаж эгээрч, бодож сэтгэж явдаг юм бас хүсэл зорилго нь ямар юм гэдгийг бүгдийг нь хойч үедээ өвлүүлэн үлдээх энэ төслийг нөхрийн маань удирддаг “Мизү” компани дэмжин хамтран ажиллахаар болсон. Продюссер гэх болсны тухайд монгол тулгатан даяарын эрхэм хүмүүсийн тухай бүтээл хийх санааг минь үнэлэн ингэж нэрийдэх болсон байж болох” хэмээх тайлбарыг өгч байжээ.

Түүнээс гадна өнөөгийн Ерөнхийлөгчийн зөвлөх Асашёрюү Д.Дагвадорж П.Анужингийн нөхөр Д.Эрдэнэбаттай “Мизу” компанийн хувь эзэмшил болон 10 сая ам долларын асуудлаар шүүхдэлцэж байжээ. Энэ талаар Д.Эрдэнэбат хэвлэлийнхэнд хүртэл хандаж байсан бөгөөд “Миний бие одоогоос хэдэн жилийн өмнө Монгол түмний хайр хүндэтгэлийн хүлээсэн сүмогийн их аварга Д.Дагвадорж, УИХ-ын гишүүн Д.Сумьяабазар, Үндэсний хөрөнгө оруулалтын банкны ТУЗ-ийн дарга Б.Баярсайхан нартай холбогдож, тэд манай төслүүд дээр нэмэлт хөрөнгө оруулалт хийх, хөрөнгө оруулагчдыг надад танилцуулсан. Тэрхүү хөрөнгө оруулагч нь БНХАУ-ын иргэн Хуан Ёу Лун буюу та бид түүний гэргий нь Хятадын алдарт жүжигчин Жао Вэй буюу “Хуан Жу Гэг”  нэрээр  мэдэх байх. Бидний хэрэгжүүлж байсан төсөл дээр нэмэлт хөрөнгө оруулалт хийхээр Хуан Ёу Лун Эрдэнэбат миний нэр дээр 10 сая долларын зээлийн гэрээ хийсэн. Уг мөнгийг Д.Дагвадоржийн банк болох ҮХОБ-аар дамжуулан оруулж ирсэн ч мөнгө бүтнээрээ Д.Дагвадоржийн хувийн данс руу шилжсэн байдаг юм. Өөрөөр хэлбэл, захиран зарцуулалтыг Д.Дагвадорж хийсэн байдаг. Зээлийн гэрээг нэр дээрээ хийсэн миний бие ганц ч долларыг захиран зарцуулалгүй, миний хувийн дансанд нэг ч доллар шилжин орж ирээгүй. Гэтэл Хуан Ёу Лун 10 сая доллараа 15 сая доллар болгон надаас нэхэмжилж эхэлсэн тул энэ хэргийг би хуйвалдааны, залилангийн шинжтэй хэмээн үзэж Монголын хууль хяналтын байгууллагад хандан, энэ хэрэг одоо шалгагдаж байна” хэмээн мэдэгдэж байжээ.

Хэдийгээр П.Анужин, Асашёрюү Д.Дагвадорж нарыг оффшор бүсэд бүртгэлтэй тус компанид одоогоор хамааралтай эсэх нь тодорхойгүй ч дээрх мэдээллүүд эдгээр эрхэмүүдийг оффшор бүс рүү “хөтөлж” магадгүй байна. 

24tsag.mn