“Утааны эсрэг ээж аавууд” ТББ-аас өнөөдөр НЗДТГ-ын гадна талбайд жагсаал зохион байгууллаа.
Энэ үеэр "Утааны эсрэг ээж аавууд" ТББ-ын тэргүүн Ц.Пүрэвхүү "Засгийн газар энэ онд Агаар орчны бохирдлыг бууруулах үндэсний хөтөлбөрийг баталсан. Найман жилийн хугацаанд 9.9 их наяд төгрөгийн санхүүжилтээр хэрэгжих тус хөтөлбөрийн 1.5 их наяд төгрөг нь гэр хороололд дэд бүтэц суурилуулах, Өмнөговийн нүүрсийг Улаанбаатарт авч ирж гэр хороололын айлуудад түгээх зэрэг утаатай шууд холбоотой ажилд, үлдсэн хэсэг нь хот хоорондын аялал жуулчлалын үйлчилгээний цэг барих, гүүр, нүхэн гарц байгуулах зэрэг утаатай холбоогүй шахуу ажилд зарцуулахаар байгаа" гэдгийг онцолсон.
Нийслэлийн агаарын бохирдлын дийлэнх хувь гэр хорооллоос үүдэлтэй. Тиймээс тус ТББ-аас гэр хорооллын дэд бүтцийг бий болгох, орон сууц барих чиглэлд нийслэлийн удирдлагуудыг анхаарлаа хандуулж ажиллахыг шаардаж байна. Тухайлбал, ирэх оны есдүгээр сарын 01 гэхэд 3000 айлын түрээсийн орон сууц барьж, ашиглалтад оруулах, 20 мянган айлыг дэд бүтцэд холбох зэргийг дурьдаж болох юм.
Тэгвэл “Утааны эсрэг ээж аавууд” ТББ-ын зохицуулагч Т.Мандахжаргал жагсаалын үеэр “Ногоон зээлийн сан” өнөөдрийг хүртэл иргэдэд зээл өгч чадахгүй байгаа. Харин арилжааны банкууд иргэдэд 17-19 хувийн хүүтэй Ногоон зээл олгож байна. Нэг айл байшингаа дулаалж, цахилгаан халаагуур худалдан авах, хоёр тарифтай тоолуур, цахилгааны утас авахад 10 сая төгрөг шаардлагатай байгаа юм. Ингэж тооцвол иргэн 10 сая төгрөг зээллээ гэхэд гурван жилийн хүүнд 6 сая төгрөг төлөх болно. Энэ бол маш өндөр хүү. Харин гадаад орнуудын Ногоон зээл маш бага хүүтэй байдаг. ХБНГУ л гэхэд жилд 1.7 хувийн хүүтэй байх жишээтэй. Тиймээс төр, засгаас ногоон зээлийн хүүг бууруулахыг шаардаж байна” хэмээв.
Засгийн газар энэ оны гуравдугаар сард Агаар, орчны бохирдлыг бууруулах үндэсний хөтөлбөрийг баталсан. 2025 он хүртэл хэрэгжих энэхүү хөтөлбөрт 9.9 их наяд төгрөг зарцуулахаар төлөвлөсөн юм. Өөрөөр хэлбэл, жилд 1 их наяд 124 тэрбум төгрөгийг агаарын бохирдлыг бууруулахад зарцуулна. Гэтэл энэ оны нийслэлийн төсөвт ердөө 28 сая төгрөг төсөвлөснийг тус байгууллагын гишүүд шүүмжилж байлаа. Жагсаалын үеэр ширээн дээр бэлэн өргөдлийн маягт байрлуулсан байна. Иргэд тус маягтад агаарын бохирдлыг бууруулах чиглэлд өөрсдийн гаргаж буй санал санаачилга, хотын удирдлагад хүргүүлэх шаардлагаа бичиж болох юм. Жагсаалын дараа дээрх өргөдлүүдийг Нийслэлийн Засаг даргад хүргүүлэх аж.
“Утааны эсрэг ээ аавууд” ТББ дараагийн жагсаалаа энэ сарын 20-нд Агаарын бохирдлыг бууруулах газрын гадна талбайд зохион байгуулах юм байна.
