Мэргэжлийн сүмо бөхийн 70 дахь их аварга Харүмафүжи Д.Бямбадорж нутаг нэгт залуу бөх Таканойва А.Баасандоржийн биед халдаж, хүнд гэмтэл учруулсан гэх дуулиан Японд дэгдээд байгаа билээ. Таканойва А.Баасандоржийн хувьд Харүмафүжи Д.Бямбадоржид зодуулсны улмаас гавлын яс нь цуурч, тархи нь хөдөлсөн гэх мэдээлэл тархаад байгаа.

Мөн хэрэг явдлын талаар “Өнгөрсөн сард Тоттори мужид тойргийн барилдаан хийхээр очоод байхдаа Харүмафүжи Д.Бямбадорж Таканойва А.Баасандоржтой маргалдаж, улмаар түүний толгойн тус газарт шар айрагны шилээр цохисон” гэх мэдээлэл тархсан. Тэгвэл Асашёорюү Д.Дагвадорж энэ талаар жиргэжээ. Ингэхдээ тэрбээр “Пивоны шилээр цохиогүй юм билээ, хэрэг явдлын талаар дараа яръя. Пивоны шил л лав биш” гэсэн байна.

 
Чухам юу болсныг олж тодруулахын тулд дэвжээний багш нар болон бөхчүүдээс мэдүүлэг авахаар Японы Сүмогийн холбоо төлөвлөж байгаа аж.