Дарханы Төмөрлөгийн үйлдвэрийн зарим ажилтан өнгөрсөн шөнөөс хордлогын шинж тэмдэгтэйгээр эрүүл мэндийн байгууллагад хүргэгдсэн талаар Эрүүл мэндийн яамнаас мэдээлсэн билээ. Яамнаас мэдээлж байгаагаар тус үйлдвэрт ажилладаг 20 гаруй ажилтанд хорлогын шинж тэмдэг илрээд буй гэх. Гэвч үүнийг Төмөрлөгийн үйлдвэрийнхэн үгүйсгэсэн. "Дарханы "Төмөрлөгийн Үйлдвэр” ХК-д өнөөдрийн байдлаар үйлдвэрийн олон тооны ажилтнууд химийн бодисонд ноцтой хордсон, амь нас бие эрүүл мэндэд аюул учирсан нөхцөл үүсээгүй байгааг мэдэгдэж байна" гэсэн.

Тэгвэл тус аймгийн Эрүүл мэндийн төвөөс өгч байгаа мэдээллээр хордлогын шинж тэмдэгтэй өвчтөнүүдийн тоо нэмэгдэж байгаа аж. Дарханы төмөрлөгийн үйлдвэрийн ажилтнуудаас гадна бусад хүнд үйлдвэр эрхлэгчдээс эхлээд ажилгүй иргэд ч ижил шинж тэмдэг илэрч байгаа гэнэ.

Дархан-Уул аймгийн хэмжээнд богино хугацаанд тархаж буй энэ асуудлыг олон хүчин зүйлтэй холбон тайлбарлаж байгаа ч шалтгааныг эцэслэн тогтоогоогүй байна.