Ёкозуна Харумафүжи Д.Бямбадорж өнөөдөр өглөө Тоттори хотын цагдаад байцаалт өгөхөөр иржээ. Түүнийг тус цагдаагийн газар нутаг нэгт сүмоч Таканоива А.Баасандоржийг зодож, гэмтээсэн хэргээр шалгагдаж буй. Харин Харумафүжи мужийн цагдаагийн газрын автомашинд суугаад, нисэх буудлаас шууд явсан бөгөөд автомашин цагдаагийн газрын барилгын доорх авто зогсоол руу орсон байна. Тоттори хотын цагдаагийн байгууллага Харумафүжи Д.Бямбадоржийн хэргийг шалгаж дуусаад, ирэх долоо хоногийн эхээр прокурорын байгууллагад шилжүүлэх аж.

Тэгвэл өчигдөр хэргийн талаар Японы хэвлэлүүдэд нийтлэгджээ. Уг хурлын урд өдөр ёкозуна Харумафүжи зодог тайлж байгаагаа зарласан юм. Хэргийн талаарх хорооны тайлан бүрэн байдлаар эцэслээгүй байгаа нь Таканойвагийн мэдүүлэг дутуу байгаа аж. Учир нь дэвжээний эзэн Таканохана цагдаагийн шалгалтыг дуустал Сүмогийн холбоонд мэдээлэл өгөхгүй байхыг Таканойвад даалгаад байгаа аж. Тухайн өдөр юу болсон талаар хэрэг явдал аравдугаар сарын 25-ны өдөр Тоттори хотын Жохоку дунд сургуулийн төгсөгчдийн уулзалтын үеэр болжээ.

Таканойва, Тэрунофужи зэрэг бөхчүүд тус дунд сургуулийн төгсөгчид бөгөөд тэдэн дээр Монголын гурван ёкозуна болох Хакухо, Харумафүжи, Какурю нар нэмэгджээ.  Энэ үеэр Хакухо өнгөрсөн есдүгээр сард Токиогийн ресторанд гаргасан бүдүүлэг ааш авирынх нь талаар Таканойвад шүүмжлэн хэлжээ. Дараа нь тэд өөр бааранд очиж үргэлжлүүлэн ууж наргисан байна. Энэ үед Таканойва, Тэрунофүжи нарт Хакухо дунд сургуульд сурсан мэдсэн зүйлээ хэзээ ч мартаж болохгүй гэсэн сургааль, зөвлөгөө хэлж байжээ. Гэвч Хакухог ярьж байх зуур Таканойва гар утсаараа оролджээ. Үүнийг харсан Харумафүжи түүнд Хакухогийн үгийг сонсохыг шаардахад Таканойва “Би найз охиноосоо ирсэн имэйлийг уншиж байна” хэмээн хайхрамжгүй хандсан байна.

 Үүнд уурссан Харумафүжи Такаонойваг алгадаж, Хакухогоос уучлал гуйхыг шаардахад залуу бөх өөдөөс нь муухай харж, эсэргүүцэл үзүүлсэн гэнэ. Ингээд Харумафүжи түүнийг олон удаа цохиж, уучлал гуйхыг үргэлжлүүлэн шаарджээ. Тэр бас караокены удирдлага шүүрч аваад Таканойвагийн толгойд хэд хэдэн удаа цохисон байна. Эцэст нь Хакухо Харумафүжиг зогсоосноор хэрэг явдал өндөрлөсөн байна.

Үүний улмаас Таканойва толгойдоо хэд хэдэн оёдол хийлгэхэд хүрсэн тухай тайланд дурджээ.