Төрийн тусгай албан хаагчдын нэгдсэн эмнэлэг нь жилийн хугацаанд зөвхөн амбулаторийн тусламж, үйлчилгээ үзүүлж байсан бол өнөөдөр  хэвтэн эмчлүүлэх байрны нээлтээ хийлээ. Тус эмнэлгийн “Б” блок болох 10 тасаг бүхий 240 ортой, зургаан хагалгааны өрөөтэй байр үйлчлүүлэгчдээ хүлээн авахад бэлэн болжээ. Нийт 10855 метр квадрат бүхий талбайтай эмнэлгийн байрыг ашиглалтад оруулснаар дотор, мэдрэл, хүүхэд, уламжлалт, мэс засал, гэмтлийн мэс засал, яаралтай болон эрчимт эмчилгээний тусламж үйлчилгээг үзүүлэх гэнэ.

Төрийн тусгай албан хаагчдын нэгдсэн эмнэлгийг өнгөрсөн жилийн наймдугаар сард Хууль зүй, дотоод хэргийн эрхлэх асуудлын хүрээнд дахин сэргээн байгуулж, 2017 оны эхний 12 сарын байдлаар 210 гаруй мянган хүнд үйлчлүүлээд байгаа аж. Харин  “Б” блок нь ашиглалтад орсоноор 7500-8000 үйлчлүүлэгчийг хэвтэн эмчилж, 2000-2500 хүнд мэс заслын тусламж үйлчилгээг үзүүлэх бүрэн боломжтой болсон байна.

Эмнэлгийн барилгыг нээж, Хууль зүй, дотоодын хэргийн сайд Ц.Нямдорж "Өнөөдөр миний амьдралд баярт мөч тохиож байна. Өнгөрсөн 7-8 жилийн хугацаанд энэ эмнэлгийн барилгыг буулгасан, барьсан, өөрчилсөн гээд бүх үйл явдлыг бичвэл бүтэн роман болно. Би сайдаар ажиллах хугацаандаа орон барилга бариулсан. Тун удахгүй 7 дахь барилга маань ашиглалтад орно. Барилга ашиглалтад орох хүртэлх хугацаанд хүнд хэцүү цаг үе байсан. “Амьд байгаа цагтаа энэ барилгыг заавал эмнэлэг болгоно” гэж муудалцаж үе бий. 1990 оноос хойш улсын төсвөөр баригдсан анхны эмнэлгийн цогцолбор барилга. Би үндсэн ажлаа хийж дуусгалаа.

Миний шийдвэр зөв байсан гэдгийг та нар батлаж харуулаарай” хэмээн захисан бол УИХ-ын гишүүн С.Бямбацогт “Миний бие ХЗДХ-ийн сайдаар ажиллаж байхдаа бүтэц орон тооны шинэ зохион байгуулалт хийж, барилга байгууламж, үйлчилгээний стандартыг хангасан тус эмнэлгийн эхний ээлж болох А блокийг ашиглалтад оруулж, үйл ажиллагааг нь эхэлж байсан бол өнөөдөр хэвтэн эмчлүүлэх байр ийнхүү ашиглалтад орж, эмнэлэг бүрэн хүчин чадлаараа ажиллах болсонд сэтгэл хангалуун байна. Төрийн тусгай албан хаагчдын нэгдсэн эмнэлгийн эмч сувилагч, эрүүл мэндийн ажилтан та бүхэн иргэдийн эрэлт хэрэгцээнд нийцсэн, эрүүл мэндийн орчин үеийн стандарт шаардлагыг бүрэн хангасан, чанартай, хүртээмжтэй, тусламж үйлчилгээ үзүүлэхэд илүү сэтгэл тавин ажиллана гэдэгт итгэл дүүрэн байна” гэлээ.  

Мөн тэрбээр Австри улсын Засгийн газрын 7 сая еврогийн хөнгөлөлттэй зээлд хамарч, эхний ээлжийн 2 сая еврогийн үнэ бүхий тоног төхөөрөмж энэ сарын 20-нд ирнэ гэдгийг хэллээ.

24tsag.mn