80 ортой хүүхдийн тасагт 170 хүүхэд хэвтэн эмчлүүлж байна
Хүйтний улирал эхэлсэнтэй холбоотой нийслэлийн агаар, орчны бохирдлоос шалтгаалан бага насны хүүхдүүдийн дунд ханиад томууны дэгдэлт нэмэгддэг. Үүнээс болж зарим эмнэлгийн Хүүхдийн тасаг ачааллаа дийлэхгүйд хүрч байна. Иймээс Эрүүл мэндийн дэд сайдаар ахлуулсан ажлын хэсэг Чингэлтэй, Сүхбаатар дүүргийн хүүхдийн тасгийн үйл ажиллагаа, орны хүрэлцээ, хангамж зэрэгтэй танилцсан юм. Эрүүл мэндийн дэд сайд Л.Бямбасүрэн “Нийслэлийн төвийн зургаан дүүргийн хүүхдийн эмнэлгээр хоёр ажлын хэсэг гаргаад явж байна. Нийслэлийн хэмжээнд орны ачаалал 500 гаруй нэмэгдсэн. Чингэлтэй дүүргийн нэгдсэн эмнэлгийн хүүхдийн тасгийн хувьд 80 ортой. Гэвч өнөөдрийн байдлаар тус эмнэлэгт 162 хүүхэд хэвтэн эмчлүүлж буй. Ачааллыг бууруулах зорилгоор мэдрэлийн тасаг, насанд хүрэгчдийн тасгийг суллаж хүүхдийн тасаг болгон нэмэлтээр ор дэлгэн ажиллуулж байна” гэлээ.
Өвчний үүсгэгчид дөрвөөс таван вирусын дэгдэлт илэрсэн
Хан-Уул дүүргийн хүүхдийн эмнэлэг нь мөн 80 ортой, 170 хүүхэд хэвтэн эмчлүүлж байгаа аж. Томуу, томуу төст өвчний онцлог нь янз бүр байдаг. Дэлхийн эрүүл мэндийн байгууллагаас томуу, томуу төст өвчний үүсгэгч дээр лабораторийн шинжилгээг жил бүр хийдэг. Энэ жилийн хувьд тус өвчний үүсгэгчид шинжилгээ хийхэд дөрвөөс таван вирусын дэгдэлт зэрэг илэрсэн тохиолдол гарсан байна. Энэ нь А хүрээний вирусээр өвдсөн хүн эмнэлэгт хэвтээд В хүрээний вирус авах эрсдэлтэй гэж эмч, мэргэжилтнүүд анхааруулж байна. Тиймээс эцэг эхчүүд хүүхдээ эмнэлэгт хэвтүүлэхээсээ өмнө аль болох гэрийн нөхцөлд дулаан байлгах, утлага хийх зэргээр анхаарах шаардлагатай. Чингэлтэй дүүргийн эрүүл мэндийн төвийн нэгдсэн эмнэлгийн хүүхдийн тасагт хэвтэн эмчлүүлж буй Баянгол дүүргийн I хорооны иргэн Г.Наранчимэг “Хүү минь ханиад хүрч халууран, таталт өгөөд эмнэлэгт хүргэгдэн ирсэн. Хэвтэн эмчлүүлээд хоёр хонож байна. Натри, дусал, бумбанд орсон мөн физик эмчилгээ хийлгэж байгаа. Одоогоор хүүхдийн биеийн байдал хэвийн болсон” гэлээ.
Цэцэрлэгийн насны хүүхдүүд их ирж байна
Тус эмнэлгийн нөхцөл байдал хэр байгаа талаар Чингэлтэй дүүргийн эрүүл мэндийн төвийн нэгдсэн эмнэлэгийн Хүүхдийн тасгийн эрхлэгч Ж.Сүрэнчимэг “Өнгөрсөн жилийн мөн үетэй харьцуулахад өвчний дэгдэлт орой эхэлж байна. Өнөөдрийн байдлаар цэцэрлэгийн насны хүүхдүүд их ирж байна. Учир нь хүүхдүүд олноор цугларсан газар өвчлөл, вирус их тархдаг. Анхлан ирж байгаа хүүхдүүд 39, 40 хэм хүртэлээ халуурчихсан, хүнд орж ирдэг. Өнөөдрийн байдлаар арав гаруй хүүхэд ирсэн мөн арав гаруй хүүхэд гарах гэж байна. Ийм байдлаар зохицуулалт хийж байна. Маргааш гэхэд хүүхдийн тоо 180 хүрэх магадлал өндөртэй байна” гэлээ.
24tsag.mn
