УИХ-ын гишүүн, Уул уурхай сайд асан Д.Ганхуягийн охин Г.Номуундарь өөрийн цахим хуудсаараа дамжуулан улс төр, бизнесийн хүрээний нэр бүхий хүмүүсийн хүүхдүүдийг хар тамхи, мансууруулах бодис хэрэглэдэг, хүчингийн хэрэг хийсэн хэмээн мэдэгдсэн нь олны анхаарлын төвд байгаа билээ. Тус хэргийг цагдаагийн байгууллага шалгаж эхэлсэн талаар бид өмнө нь мэдээлсэн. Тэгвэл өнөөдрийн байдлаар Г.Номуундарь охины бичлэгтэй холбогдуулан 50 гаруй хүнээс байцаалт аваад байгаа аж. Өөрөөр хэлбэл бичлэгт нэр нь дурдагдсан хүмүүс болон тэдгээрийн эцэг, эх  асран хамгаалагчидаас нь тайлбар авсан байна.  Мөн шалгалтын явцад Г.Номуундарийн “Манай дүү хүчиндүүлсэн” гэх мэдээлэл худлаа болох нь тогтоогджээ. Дүү хэмээн танилцуулсан охин нь хамаатных нь охин бөгөөд өөрөө болон эцэг, эхийн байцаалт мөн шүүх эмнэлгийн шинжилгээний дүгнэлтээр уг асуудал нь тогтоогдоогүй байна.