Хэдэн жилийн турш л хотын түгжрэл, бөөгнөрсөн олон хөлийн төв цэгүүдээс залхлаа гэж ярьсан. Гэвч хэн ч зориг зүрхтэй шийдвэр гаргаагүй өдий хүрсэн. Тэгвэл өнөөдөр Су.Батболдыг “мундаг” гэж хэлмээр байна.  Учир нь галт тэрэгний төв буудал буюу вокзалын баруун талд байрлах “1000 машины зогсоол”-ын газрыг өчигдөр чөлөөллөө. Энэ бол анхны алхам. Үүнээс цааш “100 айл”-ын барилгын материалын их гацаанаас эхлээд нүүлгэн жилжүүлэх газар олон байгаа. “1000 машины зогсоол”-ыг Шүүхийн шийдвэрээр уг зогсоолын үйл ажиллагааг зогсоох, нүүлгэн шилжүүлэх талаар өмнө нь хэд хэдэн удаа мэдэгдэл өгч байсан. Уг талбайг чөлөөлөхдөө худалдаа эрхлэгчдийг авто машинуудаа өчигдөрийн байдлаар 18:00 цаг хүртэл шилжүүлэн зөөвөрлөх хугацаа өгсөн. Хэрвээ заасан хугацаанаас хойш зогсоолд автомашин үлдсэн тохиолдолд тусгай зориулалтын машинуудаар зөөж талбайг чөлөөлнө гэдгийг иргэд аж ахуйн нэгжид мэдэгдсэн боловч иргэдийн хариуцлаггүйгээс болж жаахан хэл ам гарсныг нуух юун. Автомашины худалдаа эрхлэгчдийн байрлаж байсан уг газар нь Монгол-Оросын хувь нийлүүлсэн “Улаанбаатар төмөр зам” нийгэмлэгийнх. Энэхүү газарт Улаанбаатар хотын шинэ зорчигч үйлчилгээний төв буюу орчин үеийн стандарт шаардлагад нийцсэн төмөр замын вокзал барихаар төлөвлөж үүний дагуу Нийслэлийн Засаг даргын захирамжаар олгож байжээ. Төлөвлөсний дагуу шинэ вокзалын барилгын ажил удахгүй эхлэх гэж байгаа аж. Тиймээс Нийслэлийн Газрын алба, Нийслэлийн цагдаагийн газар, “Улаанбаатар төмөр зам” хувь нийлүүлсэн нийгэмлэг хамтран авто машины худалдаа эрхлэгчдийг нүүлгэн шилжүүлэх их ажлыг эхлүүлж чадлаа. “1000 машины зогсоол”-ын авто машины худалдаа эрхлэгчид учир байдлыг  бүрэн ухамсарлан өөрсдийн машинуудаа шинээр баригдсан Авто худалдааны цогцолбор луу зөөвөрлөж эхлээд байгаа аж. Ийнхүү их хотын нүүдэл эхэллээ. Ямартай ч Нийслэлийн засаг дарга хотын бухимдлыг бага ч гэсэн арилгах ажлыг эхлүүллээ.