Шинэ он Монголын соёл урлаг, спортын томчуулд нэлээд халтай эхэлж байгааг цахим ертөнц тэр чигээрээ шуугиж байна. Оны эхний арав хоногт Монголын сор болсон ахмадууд “гар гараасаа хөтлөлцсөн” мэт шил шилээ даран бурханы оронд чимээгүйхэн зорчлоо. Их орчуулагч Х.Мэргэн, аугаа зохиолч С.Пүрэв, ардын багш Д.Банди гээд нэртэй төртэй эрхмүүд хүмүүний орчлонг орхив. Тэдний араас цахим ертөнцийн нүүр номын нөхдөөс нь эхлээд Монгол  түмэн эмгэнэлээ илэрхийлж байна. Чухам ийм цаг үед зохиолч, СГЗ С.Пүрэв агсны гэр бүлд тохиосон уй гашууг хуваалцахаар А.М.Горькийн сургуулийн төгсөгчдийн төлөөлөл очсон байна. Тэр үеэр МАХН-ын дарга Н.Энхбаяр нэгэн дурсамжийг хуваалцсан нь эмгэнэл илэрхийлэхээр ирсэн олон хүний сэтгэлд хүрчээ. Тэрбээр “Манай Пүрэв гуай ганцхан юм л хэлдэг. Тэр нь тэгж ярих юм бол Ерөнхийлөгчийг архинд гүйлгэж байсан хүн шүү гэдэг юм. Тийм хүнтэй ч юу ярихав” гэхэд тэнд байсан хүмүүсийн сэтгэлд татсан бараан сүүдэр хоромхон ч гэсэн  багассан гэдгийг С.Оюун яруу найрагч нүүр номдоо бичжээ. Харин түүний энэ сэтгэгдэлд олон хүн хариу үзүүлсэн байна. Тухайлбал, “Хэрлэн Чүлтэмсүрэн Ирж буцдаг хорвоогийн цаг хугацааны шалгуурт хүн хүнээрээ үлдэнэ гэдэг тийм ч амар биш ..тэр тусамаа өнгө мөнгөний хорвоог дээдлэх болсон энэ цөвүүн цагт жаргалд дуудагдаж ирдэг зовлонд зоргоороо очдог найзууд л үнэний хорвоод ХЭН БЭ гэдгээ харуулдаг юм... Хүн чанараа гээгээгүй л юм байна” гэсэн бол Selengemurun Lochinjav “Пүрэв ахын агуу гэдгийг харуулжээ, сайн байна...Зөв талыг нь олж харахад нэг их ухаан хэрэггүй жаахан хүнлэг байхад л болно” гэсэн байна.

            Тийм ээ, энд элдвийг бичиж янз бүрийн дүгнэлт хийхийг эрхэмлэсэнгүй. Хүн чанартай байна гэдэг улс төрөөс чухал гэдгийг л хэлэх гэсэн юм.

                                                                                                Н.Саран