Уул уурхай, хүнд үйлдвэрийн сайд Д.Сумъяабазар нэгдүгээр сарын 29-ний өдөр Улаанбаатар хотноо ОХУ-ын “Роснефть” компанийн удирдлагуудтай уулзалт хийхээр болжээ.

Тэрээр Давосын эдийн засгийн чуулга уулзалтад оролцож байгаа бөгөөд энэ үеэр  ОХУ-ын Шадар сайд Аркадий Дворковичтой уулзаж, түлш  шатахууны хангамж, геологийн салбарын хамтын ажиллагааны талаар санал солилцжээ.

Ингэхдээ түлш, шатахууны хангамжийн найдвартай, тогтвортой байдлыг хангах, үнэ бууруулах чиглэлээр хамтран ажиллах хүсэлтэй байгаагаа шадар сайд Аркадий Дворковичод илэрхийлжээ. ОХУ-ын талаас энэ чиглэлээр цаашид дэмжлэг үзүүлэн ажиллахад бэлэн байгаагаа илэрхийлсэн байна. Уулзалтын үеэр Уул уурхай, хүнд үйлдвэрийн сайд Д.Сумъяабазар “Роснефть” компанийн удирдлагуудтай энэ сарын 29-ний өдөр Улаанбаатар хотноо уулзаж, хэлэлцээ хийхээр тохиролцсон аж. Хоёр талын уулзалтаар “Роснефть” компанитай нийлүүлэлтээ бууруулахгүй, үнэ тогтвортой байлгах зэрэг асуудлыг хэлэлцэх аж.