Тус зөвлөгөөнд нийслэл болон орон нутгийн удирдах ажилтан, менежерүүд оролцож байгаа бөгөөд өнөөдөр цаашид хэрэгжүүлэх ажлуудаа хэлэлцэн Сангийн яам, Авлигатай тэмцэх газар, Татварын ерөнхий газар болон холбогдох бусад байгууллагуудаас мэргэшил, ур чадвараа дээшлүүлэх чиглэлээр мэргэжил арга зүйн зөвлөгөө авч, харилцан санал солилцож байна. 

Тухайлбал тээвэр зохицуулалтын чиглэлээр 2018 онд хийгдэх томоохон ажлууд, цаашид анхаарах асуудлууд, мэдээллийн технологийн чиглэлээр шинээр нэвтэрч байгаа үйлчилгээнүүд, тээврийн хэрэгслийн бүртгэлийн систем болон ачаа тээврийн нэгдсэн системийг боловсронгуй болгож, үйлчилгээнд нэвтрүүлэх чиглэлээр холбогдох албан тушаалтнууд танилцуулга хийж зөвлөлдсөн юм. Мөн Техникийн хяналтын үзлэгийг 2017 онд улсын хэмжээнд 551502 тээврийн хэрэгсэл хамруулсан бөгөөд цаашид үйл ажиллагаагаа боловсронгуй болгож, тээврийн хэрэгсэл эзэмшигчдийн гар утсанд үзлэг, оношлогоонд хамрагдах хугацааг мессежээр хүргэдэг байдлаар зохион байгуулахаар болж байгаа аж. 

Мөн Татварын ерөнхий газраас цахимаар татвар төлөх smartcar.mn сайт болон гар утасны аппликэйшн нэвтрүүлж байгаа бөгөөд тээврийн хэрэгслийн татвараа энэхүү системээр 2 минутын дотор төлөх боломжтой болж байгааг зөвлөгөөний үеэр танилцууллаа. Ингэснээр иргэд, тээвэрчдийн цаг завыг хэмнэхээс гадна татварын гэрчилгээнээс гарах зардлыг бууруулах ач холбогдолтой юм байна. 

Зөвлөгөөний үеэр Сангийн яамны холбогдох албан тушаалтан дотоод аудит, хяналт-шинжилгээ, үнэлгээ болон суурь үзүүлэлт, зорилтот түвшний талаар мэдээлэл өгч, үр дүнд суурилсан хяналт шинжилгээг гол болгон ажиллаж байгаа тул цаашид энэ чиглэлд анхаарал хандуулж аудитын үйл ажиллагаагаа зөв зохион байгуулан ажиллах шаардлагатай байгаа талаар зөвлөгөө өгөв. 

Ийнхүү Автотээврийн үндэсний төв ТӨҮГ-ын “Мэргэжил арга зүй 2018” Удирдах ажилтны зөвлөгөөн үр дүнтэй зохион байгуулагдаж байна. Энэхүү арга хэмжээ хууль бус тээвэрлэлт, түүнд тавих хяналт, авто үйлчилгээ эрхлэгч аж ахуй нэгж байгууллагуудад ангилал тогтоох ач холбогдол, тээврийн хэрэгслийн бүртгэлийн чиглэлээр хийгдэх ажлууд зэрэг чиглэл бүрээр тусгайлан танилцуулж, хэлэлцүүлэг өрнүүлэн үргэлжилж байна.