Монгол Улс БНСУ-тай дипломат харилцаа тогтоосны 28 жилийн ойн хүрээнд БНСУ-ын Кванжү хотын Олон улсын хамтын ажиллагааны нийгэмлэг бүрэн тоноглогдсон шүд оношлох, эмчлэх зориулалт бүхий авто машиныг “Эхэн” санд гардуулан өгчээ.Шүдний чиглэлийн клиник авто машиныг гардуулах арга хэмжээнд Нийслэлийн Засаг даргын орлогч Ш.Анхмаа, БНСУ-ын Кванджү хотын CLWH эмнэлгийн ерөнхий захирал Бум Чай Чой, гүйцэтгэх захирал Ён Чой Чон, нийслэлийн Эрүүл мэндийн газрын дарга Л.Төмөрбаатар, Шүд эрүү нүүрний эмгэг судлалын төвийн дарга Л.Хэнтий, “Эхэн” сангийн тэргүүн Р.Мөнхжаргал тэргүүтэй төлөөлөгчид оролцсон байна.
”Эхэн” сан нь Улаанбаатар хотын хүүхдүүдийн шүдний өвчлөлийг багасгах зорилгоор нийслэлийн Шүд, эрүү нүүрний эмгэг судлалын төвтэй хамтран ажиллаж, нийслэлийн хэмжээнд хүүхдийн шүдний өвчлөлийн судалгааны ажлыг өнөөдөр Баянгол дүүрэгт эхлүүлж байгаа юм байна.
Цаашид шүдний оношлогооны авто машинаа ашиглан зорилтот хэсгийг сонгон судалгааны ажлыг оношлогоо, үзлэгийн хэлбэрээр үргэлжлүүлэх ажээ. Өнөөдөр нийслэлийн эрүүл мэндийн салбарт тулгамдсан асуудлын нэг бол шүдний өвчлөл. Судалгаанаас харахад 5-6 насныхны 96 хүртэлх хувь нь шүдний өвчтэй гэсэн тоо гарсан байна. Дунд сургуулийн хүүхдүүдийн дунд хийсэн судалгаагаар 80 орчим хувь нь шүдний өвчлөлтэй байгаа аж. Энэ нь бид хүүхдийнхээ шүдний эмчилгээ оношлогоонд анхаарал хандуулах шаардлагатай байгааг харуулж байгаа юм. Нийслэл бол ганцхан шүдний төвтэй. Явуулын шүдний оношлогооны авто машинтай болсноор тус эмнэлгийн ачаалал тодорхой хувиар буурч, шүдний өвчлөл ч багасах ач холбогдолтой юм байна.
