Засгийн газраас товлоогүй байхад Монголын Морин Спорт Уяачдын Холбооноос дур мэдэн Дүнжингарав 2018 уралдааныг зохион байгуулжээ. Өнгөрсөн ням гаригт зохиогдсон Дүнжингарав уралдааныг нэг өдөрт багтаан зохион байгуулсан нь асуудал дагуулж байна. Уг нь, хоёр өдөр үргэлжлэх ёстой уралдааныг нэг өдөрт багтааснаар өглөө 07:00 цагаас оройн 21:00 цаг хүртэл үргэлжилэхэд хүргэсэн юм. Энэхүү уралдааны үеэр есөн хүүхэд мориноос унаж, гурав нь эмнэлэгт хүргэгдсэн байна.

Уралдаан ингэж сунжирснаас үүдэн оройн харанхуйд уяач нь морио, унаач хүүхдээ олохгүй нэлээд асуудал үүссэн ажээ. Ер нь, Монголын Морин Спорт Уяачдын Холбоо гэж дур зоргоороо аашлах газарт хариуцлага гэж байна уу. Эсвэл холбооных нь тэргүүн гэх эрхэм УИХ-ын дарга болохоор хууль дүрэм, журамд захирагдахгүй байж болно хэмээн ойлгоод байх шиг. Цаашид төр засгаас зөвшөөрөөгүй тохиолдолд иймэрхүү арга хэмжээ зохиовол тодорхой арга хэмжээ авдаг байх нь зүйтэй. 

ЦЕГ-ын нийтийн хамгаалах, олон нийтийн аюулгүй байдлыг хангах албаны ахлах мэргэжилтэн Ц.Баатарболдын мэдээлснээр “Хаврын бүсийн Дүнжингарав морин уралдаанд очиж нийтийн хэв журмыг сахиж ажиллалаа. Тус газарт хуурайшилт, тоос ихтэй байсан учраас морины хөл цөмрөх, салхинд цохигдох зэргээс шалтаалан морь унаж, хүүхэд бэртхэд хүрсэн. Уралдаанд оролцсон хүүхдүүд 10-13 насных байсан. Энэ үеэр цагдаагийн байгууллагын 110 алба хаагч, 23 автомашинтайгаар хамгаалалтад ажилласан” гэж мэдээлсэн байна.