Монголын үндэсний бөхийн холбооны "Их эе" өнгөрсөн 2017 оны тавдугаар сарын 28-нд хуралдаж, холбооны тэргүүнээр “Гацуурт” группийн ерөнхийлөгч Л.Чинбатыг сонгосон. Гэвч Монголын үндэсний бөхийн холбооны удирдлагууд энэхүү шийдвэрийг хүлээн зөвшөөрөхгүй байгаа билээ. Ийм ч учраас "Их эе"-ийг энэ бямба гаригт хуралдуулахаар товлоод байгаа. Жилийн өмнө хуралдсан "Их эе"-ийн шийдвэрийг бүх шатны шүүх хүчинтэй гэж үзсэн. Энэхүү шүүхийн шийдвэрийг өнөөдөр Монголын үндэсний бөхийн холбооны тэргүүн Р.Нямдоржид танилцуулахаар Шүүхийн шийдвэр гүйцэтгэх байгууллагын ажилтнууд очсон ч хүлээн аваагүй юм  Тэгвэл энэ үеэр МҮБХ-ны дэд тэргүүн Д.Данзан товч тайлбар хийсэн бөгөөд зарим асуултад хариуллаа.

-Сая Баянзүрх дүүргийн цагдаа нар ирж Бөхийн өргөөний хаалгыг эвдлэн орж, багагүй хэл ам хийлээ. Та бүхэн энэ асуудлыг юу гэж үзэж байна?

-Бидний хувьд ирэх хагас сайн өдөр “Их эе”-ийг хуралдуулж ажлаа өгөхөөр болоод байгаа юм. Гэтэл наана нь элдэв хэл ам хийж биднийг буруутгаж байгааг гайхаж байна. Анх 2006 онд тэгээд 2010 онд хэл ам дагуулсан шийдвэрийг хүчингүй болгуулж байсан. Дараа нь 2014 онд одоо харин 2018 онд хурлаа хийж ажлаа хүлээлгэж өгье л гэж байгаа. Ноднин “Гацуурт” компанийн захирал Л.Чинбат гэдэг хүнийг хуйвалдааны аргаар МҮБХ-ны тэргүүнээр сонгосон байдаг. Энэ шийдвэрт Монголын бөхчүүдийн 30 хурахгүй хувь нь л санал өгсөн сурагтай байдаг. Энэ талаар шүүхээс ар өврийн хаалгаар бидний тамга тэмдгийг булааж авахаар тохиролцоо явагдаж байгаа юм билээ. Бидний хувьд хурлаа хийж ажлаа өгнө. Манай бөхчүүдийн 80-90 хувь нь хурлаа хийх хүсэлтэй байгаа. Мандатаа авцгааж ч байгаа. Ингэхээр бидний хувьд ажлаа өгцгөөхөөр л болж байна. Гэтэл биднийг эргээд ажилдаа хоргодох байх гэж айж болгоомжлоод байгаа юмуу хаашаа юм, мэдэхгүй.

-Та бүхэн бөхчүүдтэйгээ асуудлаа ярилцаж, шинээр дарга нарын сонгууль явуулах талаар хэлэлцэж байгаа юу?

-Бидний зүгээс энэ асуудлаар бөхчүүдтэйгээ шударга, шулуухан ярилцаж л байгаа. Бидний зүгээс бөхчүүддээ “Та нар төлөөлөгчдийнхөө дундаас хэнийгээ дэвшүүлмээр байна тэднийгээ дэвшүүлж сонгоод л тэргүүнээр сонгоорой, одоо бид ажлаа өгцгөөе өө л“ гэж байгаа. Гэтэл Р.Нямдорж даргыг эргээд ажилдаа суух байх гэж айгаад байгаа юмуу хаашаа юм мэдэхгүй. Энд нэг зүйлийг хэлэхэд   Х.Баянмөнх гуай бол Монголын бөхчүүдээс хамгийн алдартайн хувьд 77-78 нас хүрч байна. Х.Баянмөнх гуай МҮБХ-ны шинэ удирдлагаар ямар хүн тодрох, хойшид юун дээр анхаарах талаар бодож санаж яваа зүйл байгаа нь тодорхой. Харин Р.Нямдоржийг шүүмжилж, загнаж “Бушуухан ажлаа өгч, шинэ удирдлагад зайгаа тавьж өгөх хэрэгтэй” энэ тэр гэж омогдож, загнаад байх шаардлага байхгүй.

Хоёрдугаарт тодорхой бөхчүүдээс авсан шинжилгээний асуудлыг Б.Бат-Эрдэнэ аварга Сөүлд танилцаад ирсэн. Түүний араас Р.Нямдорж очиж зохицуулчихаад ирсэн. Гэтэл энэ асуудлыг ихэд гүтгэн доромжилж, бидний эсрэг янз бүрийн гүтгэлгийн чанартай зүйл хийгээд байна. Одоо жишээ нь “Гондомонд шээчихээд түүнийгээ саванд хийгээд өгчихдөг юм” гэж гүтгэж яриад байна. Манай аварга бол дэлхийн медаль аваад Монголын нэрийг цуурайтуулаад явж байсан хүн шүү дээ.

Гэхдээ мань хүн хэзээ ч гондомонд шээгээд янз бүр болж байгаагүй нь тодорхой. Энэ мэтчилэн бидний эсрэг худлаа гүтгэлэг хийж, элдвээр дайрч доромжлоод байгааг бид ихэд эсэргүүцэж байна. Бидний хувьд ирэх хагас сайн өдөр “Их эе”-ээ хийж ямар ч гэсэн ажлаа хүлээлгэж өгнө. Гэхдээ өөрсдийнхөө оронд ямар ч гэсэн туршлагатай, бөхчүүдийн төлөө чин шударгаар ажиллаж чадах хүмүүсийг гаргаж ирнэ гэж бодож, бөхчүүдтэйгээ ч энэ талаар санал солилцсоор байгаа юм.

Д.Түвшин