Энэ онд нийслэлд 18 шинэ сургууль, 27 сургуулийн өргөтгөл, нийт 45 сургуулийн барилга баригдаж эхэлнэ. Үүнээс Улсын төсвийн хөрөнгө оруулалтаар есөн сургууль, 25 сургуулийн өргөтгөл, БНХАУ-ын Засгийн газрын буцалтгүй тусламжаар долоон сургууль, Япон Улсын Засгийн газрын буцалтгүй тусламжаар хоёр сургууль, хоёр сургуулийн өргөтгөл баригдахаар төлөвлөгдсөн байна.

Улсын төсвийн хөрөнгө оруулалтаар 42 цэцэрлэг, 10 цэцэрлэгийн өргөтгөл, Азийн хөгжлийн банкны хөнгөлөлттэй зээлээр хэрэгжиж буй гэр хорооллын дахин төлөвлөлтийн төслийн хүрээнд хоёр цэцэрлэг, НҮБ-ын Хүүхдийн сангийн хөрөнгөөр хоёр цэцэрлэг нийт 56 цэцэрлэгийн барилга баригдаж эхэлнэ.

Мөн 2018 онд Улсын төсөвт 3 бага сургууль, цэцэрлэгийн цогцолбор, таван спорт заал барих хөрөнгө тусгагдан батлагдсан. Улс нийслэл, дүүргийн орон нутгийн төсвийн хөрөнгө оруулалтаар он дамжин хэрэгжиж буй хоёр сургууль, зургаан цэцэрлэг, мөн тооны цэцэрлэгийн өргөтгөлийн барилга угсралтын ажил хийгдэнэ.

Нийслэлд БНХАУ-ын Засгийн газрын буцалтгүй тусламжийн хөрөнгө оруулалтаар долоог сургууль баригдахаар шийдвэрлэгдсэн. Үүнийг таван сургуулийг барих ажлын гүйцэтгэгчээр “Beijing construction engineering group” шалгарч, барилга угсралтын бэлтгэл ажлыг эхлүүлээд байна.

Нийслэлийн Засаг дарга С.Батболд “Ерөнхий боловсролын сургуулийн хичээллэх ээлжийг 2020 онд хоёр ээлжинд шилжүүлэх төлөвлөгөөтэй байна. Мөн цэцэрлэгийн хангалт хүрэлцээг 85 хувь болгоно. Энэ 2018 онд боловсролын салбарт хийгдэх ажлууд их байна. одоогоор 17 сургууль цэцэрлэгийн газрын асуудлыг шийдэх хэрэгтэй байна. Эдгээр асуудлыг удахгүй Засгийн газарт танилцуулна. 2020 оны хичээлийн жилд гурван ээлжээр хичээллэхгүй болгохоор төлөвлөн ажиллаж байна” гэлээ.

Мөн Япон Улсын Засгийн газрын буцалтгүй тусламжийн хөрөнгө оруулалтаар хоёр сургууль, хоёр сургуулийн өргөтгөл баригдана.

НҮБ-ын Хүүхдийн сангийн хөрөнгөөр нийслэлийн Боловсролын газар, Баянзүрх дүүргийн ЗДТГ хамтран Баянзүрх дүүргийн 9,17 дугаар хороонд тус тус 100 хүүхдийн хүчин чадалтай цэцэрлэг барих төслийг эхлүүлээд байна.

Азийн Хөгжлийн банкны хөнгөлөлттэй зээлээр хэрэгжих төслөөр нийслэлд есөн сургууль, 22 цэцэрлэг баригдана. Энэ онд барилгын зураг төслийг боловсруулах, худалдан авах ажиллагааны бэлтгэлийг хангаж 2019 оноос барилга угсралтын ажлыг эхлүүлэхээр төлөвлөжээ.