Төрийн өндөр албан тушаалтнуудын гаргасан гомдлыг барагдуулах хоёр ч шүүх хурал өнөөдөр товлогджээ. Гүтгэсэн гүтгүүлсэн гэх агуулгатай шүүх хурлын талаархи товч мэдээллийг та бүхэн хүргэж байна. 

Үндсэн хуулийн цэцийн гишүүн Д.Сугар УИХ-ын гишүүн, Эрчим хүчний сайд Ц.Даваасүрэнг шүүхэд өгсөн. Учир нь, цэцийн гишүүний нэр төрд халдаж, доромжилсон гэх үндэслэлтэй. Уг нэхэмжлэлийг хэлэлцэх шүүх хурал өнгөрсөн хоёрдугаар сард болсон ч сайд Д.Даваасүрэнгийн талаас нэмэлт материал цуглуулах хүсэлтийг тавьснаар хойшлогдсон юм.  

Тэгвэл уг асуудлыг хэлэлцэх шүүх хурал өнөөдөр 14.00 цагаас Сүхбаатар дүүргийн анхан шатны шүүхэд болох юм байна. Хэрэв дахин ямар нэгэн шалтаг, шалтгаан тоочихгүй бол хурал өрнөж, хэнийх нь буруу зөв гэдгийг тодорхойлно. 

Үүнээс гадна ТЕГ-ын дарга асан генерал Б.Хурц “Цензургүй яриа” нэвтрүүлэгт орохдоо ТЕГ-ын Сөрөх тагнуулын дарга асан хурандаа Д.Цогтбаатарыг Германы иргэнээс“бенз” маркийн автомашин, сая евро авсан гэж ярьсан нь мөн л гүтгэлэг хэмээн үзсэн. Тодруулбал, хурандаа Д.Цогтбаатар "Намайг гүтгэсэн" хэмээн шүүхэд хандсан билээ. Тэгвэл энэхүү гомдлыг эцэслэх шүүх хурал өнөөдөр товлогджээ. Шүүх хурал Хан-Уул дүүргийн шүүхэд болох юм байна.