Монгол Улсад “Азийн орнуудад хүртээмжтэй даатгалыг хөгжүүлэхэд зохицуулалтын байгууллагын оролцоо” хөтөлбөрийн төлөвлөгөө 2017 онд 100 хувийн хэрэгжилттэй байна гэж Шри Ланка Улсын Коломбо хотноо өнгөрөгч долоо болсон Төр-хувийн хэвшлийн Олон Улсын зөвлөлдөх V уулзалтаас дүгнэлээ.
ХБНГУ-ын Олон Улсын Хамтын ажиллагааны нийгэмлэгээс хэрэгжүүлж буй дээрх хөтөлбөрт манай улс, Шри Ланка болон Индонез, Вьетнам, Пакистан, Балба, Филиппин улсууд хамрагддаг бөгөөд хөтөлбөрийн хүрээнд оролцогч орнуудыг даатгалын зохицуулагчдыг харилцан суралцуулах, төр, хувийн хэвшлийг хүртээмжтэй даатгалын асуудлаар санал солилцуулах уулзалтыг сүүлийн жилүүдэд тогтмол зохион байгуулж байна. Төр-хувийн хэвшлийн Олон Улсын зөвлөлдөх V уулзалтаар “Технологийн дэвшил даатгалд: Блокчейн сүлжээ ба програм хангамж”, “Пропорциональ зохицуулалтын орчин”, “Технологийн дэвшлийг даатгалд ашигласан амжилттай туршлагууд: Шри-Ланк улс”, “Цаг агаарын өөрчлөлтийн эрсдэлийн даатгал дахь технологийн дэвшил” болон “Хөдөө аж ахуйн даатгал дахь технологийн дэвшил” сэдэвт хэлэлцүүлгүүд болов.
Шри Ланкын уулзалтад манай улсаас Санхүүгийн зохицуулах хорооны Даатгалын газрын дарга М.Өлзийбат тэргүүтэй төлөөлөгчид оролцож, хүртээмжтэй даатгалыг хөгжүүлэх чиглэлээр болон хөтөлбөрийн хүрээнд явуулж буй бодлого, үйл ажиллагаагаа танилцуулж, Азийн бусад улс орны энэ талаарх ололт, туршлагаас хуваалцав. Манай улсын хувийн хэвшлийг төлөөлөн “Улаанбаатар хотын даатгал” ХХК-ийн гүйцэтгэх захирал М.Энхболд, Даатгал хариуцсан дэд захирал А.Мөнхбазар нар уулзалтад оролцсон юм. Тэд хүртээмжтэй даатгалын бүтээгдэхүүн, үйлчилгээ, сул болон давуу тал, боломжийн талаар түлхүү сонирхож байлаа.
Уулзалтын хүрээнд хөтөлбөрт оролцогч улсуудын мэдлэг, туршлага солилцох сүлжээ (MEFIN, The Mutual Exchange Forum on Inclusive Insurance)-ний бүс нутгийн удирдлагын хороо болон ажлын хэсгүүдийн хуралдаан болж, хөтөлбөрийн 2017 оны үйл ажиллагаа, үр дүн, 2018 онд хийх ажлын төлөвлөгөөг хэлэлцэв. Энэ онд манай улс хүртээмжтэй даатгалын зохицуулалтын орчныг сайжруулах, иргэдийн санхүүгийн боловсролыг дээшлүүлэх, даатгуулагчийн хэрэгцээ шаардлагад нийцсэн хүртээмжтэй даатгалын шинэ бүтээгдэхүүнийг бий болгох чиглэлээр томоохон зорилтуудыг тавьж ажиллахаар боллоо.
