"Алтай констракшн" ХХК-ийн  барьж буй "Саруул" хорооллын барилгын кран унаж ноцтой осол гарсан байна. Уг барилга нь Баянзүрх дүүргийн 26-р хорооны нутаг дэвсгэрт баригдаж байгаа бөгөөд өргөгч цамхаг унахдаа хэд хэдэн машиныг эвдэлж гэмтээжээ. Иргэдийн эд зүйлсийг гэмтээсэн ослын үеэр азаар хүний амь нас эндээгүй аж. Магадгүй тухайн орчинд хүн явж байсан бол ямар хэмжээний асуудал үүсэх тодорхой. Осол өчигдөр оройн 17 цагийн үед болсон бөгөөд ажил, хичээл тараагүй хүний хөдөлгөөн сийрэг байх үед таарсан нь азтай мэт. Гэхдээ краны жолооч бэртэж эмнэлэгт хүргэгдсэн байдалтай байгаа юм байна.  

Олон удаан жилийн насжилттай дээр үеийн кранууд хэзээ мөдгүй нурна хэмээн ярих нь бий. Тэгвэл эхнээсээ ийнхүү нурж эхэллээ. Цаашид барилгын компаниуд Хөдөлмөрийн аюулгүй байдалд хайнга хандах нь хүн ам, орон сууц төвлөрсөн газарт төсөөлөөгүй гай гамшиг авчрах магадлал өндөртэй  гэдэг нь эндээс харагдаж байна. Компанийн хайнга, хөдөлмөрийн нөхцөл байдалд дүн шинжилгээ хийж, аюулгүй байдлыг боддоггүй нь ч харагдах. Үүнээс гадна "Алтай констракшн" ХХК энэ тал дээр маш сул гэдэг нь ч тодорхой болж байна. Учир нь, кран ямар учраас унасан болохыг харахаар авирсан залуу ч осолдох магадлалтай харагдах.

Ямар ч хамгаалалтын хэрэгсэлгүй дээш авирч байх жишээтэй. Ийм байхад дахин аваар осол гарахгүй гэх баталгаа алга. Цаашид энгийн гэлтгүй ажилчид нь ч амь насаа алдах магадлал өндөр ажээ. Хүн ажиллуулж өөрийн хэргээ бүтээх нэг хэрэг. Харин ажилчныхаа аюулгүй байдалд санаа тавих нь компанийн асуудал. Тэгвэл "Алтай констракшн" ХХК ажиллагчиддаа огт анхаарал тавьдаггүй бололтой. Зөвхөн тэднээр ажил хийлгэж байвал барав гэсэн шиг аюулгүй ажиллах нөхцөлийг орхигдуулсан юм шиг. Иймд тус компанид хариуцлагын асуудлыг тавих зүйтэй. Мөн хуулийн дагуу иргэдийн холхирлыг 100 хувь барагдуулах биз. 

Үүнээс гадна "Алтай констракшн" компанийн барилгын объектод 2017 оны наймдугаар сарын 14-ны өдөр хяналт шалгалт хийж, илэрсэн зөрчлийг арилгуулахаар улсын байцаагчийн албан шаардлагыг хүргүүлж ажилласан байна. Мөн нийслэлийн мэргэжлийн хяналтын газраас 2018 онд барилга угсралтын чиглэлээр үйл ажиллагаа явуулж байгаа бүх аж ахуйн нэгжүүдэд болзошгүй эрсдэлээс урьдчилан сэргийлэх мэдэгдлийг хүргүүлсэн гэнэ. Ийм арга хэмжээ ав хэмээн үүрэг өгч байхад хайнга хандсан "Алтай констракшн" компанийг яах ёстой юм бол.