Нисванис хамтлагийн гитарчин, дуучин Л.Энх-Амгалантай энэ жилийн “Playtime” наадмын сонин сайхан болоод хамтлагийн сүүлийн үеийн уран бүтээлийн талаар ярилцлаа.
     Нисванис хамтлагийн гитарчин, дуучин Л.Энх-Амгалантай энэ жилийн “Playtime” наадмын сонин сайхан болоод хамтлагийн сүүлийн үеийн уран бүтээлийн талаар ярилцлаа.

- Сайн байна уу?  Юуны өмнө таны мэндийг мэдэх нь зөв болов уу?
- Сайн. Сайн байна уу? 24tsag.mn-ий нийт уншигчиддаа энэ өдрийн мэнд хүргэе

- Өнгөрсөн амралтын өдрүүдэд “Playtime-2012” наадам болж өндөрлөлөө.Танай хамтлаг  энэхүү наадамд жил бүр оролцдог байх аа?  Энэ жилийн  “Playtime” өмнөх жилийнхүүдээс юугаараа ялгаатай бас онцлог болов?
- Бид  “Playtime” наадмыг анхнаас нь дэмжиж оролцсон хамтлагийн хувьд байнга оролцож ирсэн. Гэхдээ энэ жил бяцхан шалтгаанаар оролцож чадаагүйдээ үзэгчдээсээ хүлцэл өчие. Амьд хөгжим сонирхдог хүний хувьд шинэ залуу хамтлагуудын тоглолтыг нэг бүрчлэн үзэж харсан. Манай хамтлагууд жигдхэн сайжирч байгаад баяртай байна. Би жил бүр  “Playtime” наадмаас нэг хамтлагт дуртай болоод  буцдаг. Өнгөрсөн жилүүдэд гэхэд  “Sir alex”, “Lego” гэх мэт хамтлагууд байсан. Харин энэ жил “Left limbo” хамтлаг миний анхаарлыг их татсан. Сайн хамтлаг. Хамтлаг болох бүх талын төлөвшил мэдрэгдсэнд би их баярласан. Хөгжмийн найруулга, үг, утга санаа илэрхийлэл маш сайн байсан. Эдгээр залуусдаа ахын хувьд амжилт хүсье!

- Урлагийн хүмүүсийн хувьд зун, өвөлгүй л уран бүтээлийн ажил ихтэй байдаг байх? Энэ зун ямар нэг шинэ уран бүтээл дээр ажилав уу?
- Миний хувьд өнгөрсөн 11 сард “TV5” телевизын захиалгаар “Чоны алтан шагай” киноны хөгжмийг бичсэн. Тэр багийн залуус 24 ангит кино хийж байгаа. Намайг киноныхоо  хөгжмийн зохиолчоор ажиллах санал тавиад би чадах ядахаараа оролцоод энэ зуныг өнгөрөөлөө. Энэ кино есөн сар гээд  “TV5” телевизээр гарах байх.  Хүмүүс намайг рок хамтлагийн дуучин гэдэг талаас нь мэдэхээс хөгжмийн зохиомж оролддогийг сайн мэдэхгүй байж магадгүй. Энэ тал дээр залуу хүнийхээ хувьд өөрийгөө нээх боломж олдож байгаа. “TV5” телевизын хамт олонд баярласнаа илэрхийлээд сайн зүйл хийх болно гэж хэлэхийг хүсч байна. Харин хамтлагын хувьд ерөнхийдөө тархай бутархай амарсан байдалтай л өнгөрлөө. Гэхдээ бид “Дашка” студи дээр 12 дууны гэрээ хийсэн байгаа. Удахгүй бэлтгэлээ эхлүүлнэ. Бэлэн байгаа эхний зургаан дууны бичлэгтээ орохоор тохирсон байгаа.

- Хувийн асуудал руу орж байна гэж дургүйцэхгүй биз дээ.Таныг өрхийн тэргүүн болоод удаагүй байгааг мэдэхгүй хүн цөөхөн байх аа. Ганцаараа байж байгаад бүл нэмэхээр мэдээж  давхар таньд хариуцлага нэмэгдэж байгаа байх.  Уран бүтээлийн хажуугаар гэр бүлдээ цаг зав гаргах гээд л завгүй л гүйгээд байна уу?
- Тэгэлгүй яахав. Хүнд гэр бүл эрхэм шүү дээ!  Залуу хүний хувьд ажил хэзээл бол хэзээ, яаж л бол яаж амжуулна гэж боддог. Харин гэр бүлийнхээ тэр халуун дулаан уур амьсгалыг үргэлж хамгаалж явах  чухал шүү дээ.   

- Сүүлийн үед “Нисванис” хамтлаг нам жим байна. Хамтлагийн гишүүд хаагуур явж байна вэ?
- Хамтлагийн соло гитарчин хувийн шалтганаар хамтлагаас гараад оронд нь “Gokers wild”  хамтлагын гитарчин залуу орсон байгаа. Хамтлагийн гишүүд түр зуур орж гарах бол амьд хөгжмийн хамтлагт байдаг л асуудал. Шинэ гишүүнтэй болоод юм хийж цаашлаад өсөж өндийх асуудал илүү чухал. Бид энэ тал дээр санаа зовохгүй байгаа.  Удахгүй шинэ дуунууд гараад ирхээр “Нисванис” аль төвшинд байгаа нь мэдрэгдэх байх аа.  Ер нь бүгд л ажилтай л яваад байна.

- "Сонсохыг хориглоно", "Сонсохыг хориглоно-2", "Харанхуй цээжний цонх", “Nisvanis Go Unplugged” мөн хамийн сүүлд буюу өнгөрсөн жил “Нис Нис” тоглолтуудаа  хийсэн. Тэгвэл дараагийн тоглолт хэзээ байх бол?
- Манайх жилд албан ёсны  хоёр тоглолт хийдэг. Нэг нь есөн сарын 18-нд.  Манай фэн клуб зохион байгуулдаг. Харин нөгөө нь манай хамтлаг өөрсдөө зохион байгуулдаг “Нис Нис” тоглолт. Жил бүрийн дөрвөн сарын 9-нд болдог. Энэ тоглолт хаврын  рок наадам гэдгээрээ онцлогтой. Тиймээс удахгүй фэн клубын зүгээс зохион байгуулдаг тоглолт болно.

-Таньд баярлалаа. Ажил хөдөлмөр хийгээд амьдралд тань сайн сайхан бүхнийг сайтынхаа хамт олны өмнөөс хүсэн ерөөе
-За та бүхэнд  ч гэсэн ажлын амжилт хүсье!