Энэ сарын 26-ны өдөр Архангай аймгийн Батцэнгэл сумын уугуул Монгол Улсын хүчит заан, бөхийн чөлөөт барилдааны Олон улсын хэмжээний мастер Дүгэржавын Хишигдоржид зориулсан "Хишигтэй заан" дууг хэн сайн дуулах вэ? уралдааныг тус сумын ерөнхий боловсролын сургуулиас санаачлан анх удаа зохион байгуулжээ.

Энэхүү уралдааны зорилго нь нутгаасаа төрөн гарсан Д.Хишигдорж заанд зориулан зохиосон дууг сурагчид дуулж сурах, олон нийтэд түгээн дэлгэрүүлэхэд оршиж байгаа аж. Тус уралдаан сургуулийн ахлах, дунд ангийн сурагчдын дунд болсон ба ахлах ангийн төрөлд 11а ангийн сурагч С.Цогтбаяр, дунд ангийн сурагчдын төрөлд 9а ангийн сурагч А.Мөнгөнцоож нар тус тус тэргүүлжээ.

Уралдааны шүүгчээр Батцэнгэл сумын Соёлын төвийн эрхлэгч, МУСТА Ч.Ганбаатар, МУСТА, хөгжимчин н.Дэлгэрцогт, Соёлын төвийн хөгжмийн багш, МУСТА Н.Алтанчимэг, Архангай аймгийн ЗДТГ-ын хэвлэл мэдээлэл, соёл, спорт хариуцсан ажилтан, Хүүхдийн элч, хуульч, яруу найрагч Н.Базардэрэг нар ажилласан байна.