Монголчууд зүрх судасны өвчлөл, халдварт болон хорт хавдрын өвчлөлөөр нас бардаг байсан бол сүүлийн үед шүдний өвчлөлөөр нас барах болжээ. Энэ нь амны хөндийн эрүүл мэндийн боловсрол Монголчуудад  дутуу дулимаг байгаагийн тод жишээ аж. Шүдний өвчлөл нь бүх өвчний их үүсвэр болдог. Гэтэл манайхан шүдээ өвчилж, буйл нь хавдан идээлж үрэвсэж байхад түр зуур өвчнийг нь намжааж орхиод удаан явсаар эцэс сүүлд нь шүдний сувгийн архаг үрэвсэл болдог. Ингэж явсаар амь нас нь эрсдэх даваан дээр эмнэлэгт хандаж байна.

Шүдээ эмчлүүлэхгүй идээт үрэвсэлтэй удаан явснаар өвчин даамжирч, эрүү ясны хальсны үрэвсэл, бүүр цаашлаад эрүүний яс нь тэр чигтээ идээлж ясны үрэвсэл үүсдэг. Мөн гол мэдрэлийн судаснуудаар идээ гүйж, амь насаа алдах тохиолдол ихсээд байгаа аж. Монголчуудын нас баралтын бас нэг шалтгаан болж байгаа шүдний идээт үрэвслээс урьдчилан сэргийлэхийн тулд хүүхэд багачуудаа багаас нь амны хөндийн эрүүл ахуйг сахиулах хэрэгтэй. Мөн 6 сар тутамд тогтмол эмчийн үзлэгт оруулж байх нь чухал гэдгийг мэргэжилтнүүд онцлоод байгаа юм.