“Монгол медиа ивэнт групп” ХХК, Олон улсын аялал жуулчлалын хөгжлийн төв хамтраад энэ сарын 25-27-ны өдрүүдэд “Мишээл” экспо олон улсын үзэсгэлэнгийн төвд “Wonder travel expo 2018” буюу “Аяллын гайхамшиг 2018” үзэсгэлэн яармаг зохион байгуулах тухайгаа өнөөдөр хэвлэлийнхэнд мэдээллээ.

Энэхүү үзэсгэлэнд оролцох аж ахуйн нэгжүүд аялал жуулчлалын үйл ажиллагаагаа сурталчилж  иргэдэд хэрэгтэй мэдээлэл өгөх юм байна. Энд аяллын даатгал, аяллын зээл, эрүүл мэндийн аялал жуулчлал, гадаад руу зуучлах эрүүл мэндийн зөвлөгөө оношлогооны талаарх зөвлөгөө өгөх юм байна. Мөн визний зөвлөх үйлчилгээ байхаас гадна байгалийн үзэсгэлэнт газрын гэрэл зургийн үзэсгэлэн дэлгэх гэнэ. Үзэсгэлэнд оролцох  аялал жуулчлалын компаниудыг бүртгэж эхэлсэн байна.  

Энэ үзэсгэлэнгээр дамжуулж аялал жуулчлалын компаниуд бүтээгдхүүнээ  сурталчилахаас гадна иргэдэд  хариуцлагатай, аюулгүй аялж жуулчлахыг ойлгуулах, Монголын түүхэн дурсгалт болон байгалийни үзэсгэлэнт  газар, үйлчилгээний байгууллага, урлаг соёлыг үйлчилгээг олон нийтэд таниулна.

Дэлхий даяар 2005 онд 528 сая жуулчин аялж байсан бол 2015 онд 1.19 тэрбум жуулчин аялсан байна. Дэлхийн аялал жуулчлалын байгууллага энэ тоог  2030 он гэхэд 1,8 тэрбум давна гэж үзэж байгааг зохион байгуулагчид хэвлэлийн бага хурлынхаа үеэр бас дурдлаа.