Хөдөлмөр, нийгмийн зөвшлийн гурван талт 2017-2018 оны Улсын хэлэлцээрийн дагуу цалин нэмэгдүүлэхээр  2018 оны тавдугаар сарын 01-ний өдөр эхэлсэн хэлэлцээрийн үед Засгийн газрын зүгээс нааштай санал гаргаагүй учраас түр завсарлаад байна.

Өнөөдөр МҮЭ-ийн холбооноос Хөдөлмөрийн сайд С.Чинзоригт хандан тавдугаар сарын 14-ний өдөр хэлэлцээрээ үргэлжлүүлж,  цалингийн нэмэгдлийн асуудлаа яаралтай хэлэлцэж шийдвэрлэхийг дахин шаардаж албан тоот хүргүүллээ.

Хэрэв хэлэлцээр үргэлжлэхгүй, удаашрах, тодорхой үр дүнд хүрээгүй тохиолдолд нийт ҮЭ-үүд Хөдөлмөрийн хамтын маргаан үүсгэж, ажил хаялтыг хуулийн хүрээнд зохион байгуулна гэдгээ хатуу санууллаа. Эрүүл мэндийн салбарын ҮЭ-ээс ажил хаялт зохион байгуулахад бэлэн байгаагаа удаа дараа мэдэгдэж байсан.

Хэрэв ирэх даваа гарагт ямар нэгэн шийдэл гарахгүй бол орон даяар ажил хаялт өрнөж, иргэд, хүүхдүүд хохирох нь. Гэхдээ үүний буруутан нь МҮЭХ, түүний харьяа байгууллага, гишүүд биш юм. Хэргийн эзэн нь төр, Засгийн газар болж хувирна гэдгийг эмч, багш нарын хороо мэдэгдсэн юм.