Засгийн газрын 2016 оны 55 тоот тогтоолоор Гэр бүл, хүүхэд, залуучуудын хөгжлийн газрын дэргэд “Хүүхдийн тусламжийн 108 утасны үйлчилгээний төв”-ийг байгуулсан. Тэгвэл өнөөдөр тус төвийн үйлчилгээг өргөжүүлж, олон ажил хийхээр төлөвлөн Гэр бүл хүүхэд залуучуудын хөгжлийн газар, Дэлхийн Зөн Монгол Олон Улсын байгууллага, Мобиком корпораци хамтын ажиллагааны санамж бичигт гарын үсэг зурлаа.
Эдгээр байгууллага хамтран ажилласнаар 2018 онд Хүүхдийн тусламжийн 108 утасны үйлчилгээний төвийн программын гуравдугаар шатны шинэчлэлийг хийж, хүний нөөцийг мэргэшүүлэх, дуудлагын тоог нэмэгдүүлж, онлайн чат, утасны мессежээр зөвлөгөө, мэдээлэл өгөх зэрэг хариу үйлчилгээг чанаржуулах юм байна.
Энэ үеэр ГБХЗХГ-ын дарга О.Алтансүх "Бид өнгөрсөн онд 108 утасны төвийн дэргэд хамгаалах байр байгуулж, шуурхай тусламжийн машинтай болгосон нь хувийн хэвшил, төр мөн олон улсын байгууллагын, үр дүнтэй хамтын ажиллагаа юм. Иймд өнөөдөр хамтын ажиллагааны санамж бичгээ үргэлжлүүлэн зурах аз тохиож байна. Энэ нь монголын хүүхдүүдийн хувьд том аз юм. Тийм учраас Дэлхийн Зөн Монгол Олон Улсын байгууллага болон Мобиком корпорацийн хамт олонд чин сэтгэлийн талархал илэрхийлье" гэв.
Дашрамд дуулгахад, тус төвд сард дунджаар 10 мянга гаруй дуудлага ирдэг гэх тоон мэдээлэл гарчээ. Өнгөрөгч 2017 онд гэхэд л 144 мянга 869 дуудлага хүлээн авсны гурван мянга 173 тохиолдлыг аймаг, орон нутгийн ГБХЗХГ, хэлтэс, хамтарсан багт шилжүүлж, 63 хувийг бүрэн шийдвэрлэж, 1,392 тохиолдлыг шийдвэрлэхээр ажиллаж байгаа юм байна.
