Бидний нэрлэж заншснаар 100 айл буюу Сүхбаатар дүүргийн 9, 10, 11-р хорооны нутаг дэвсгэрт байрлах барилгын материалын захыг нүүлгэх ажлыг судлан хэрэгжүүлэх ажлын хэсэг хуралджээ.
Энэ орчимд ил задгай худалдаа эрхлэгчид болон хүний биед сөрөг нөлөө үзүүлэхүйц барилгын материалын үйлдвэрлэлийн үйл ажиллагааг зогсоосон байна. Түүнчлэн нийтийн эзэмшилийн зам талбайд эрх бүхий байгууллагын зөвшөөрөлгүйгээр газар ашиглаж байгаа иргэд, аж ахуйн нэгжийн үйл ажиллагааг албадан зогсоож, газар чөлөөлөх албан шаардлагыг хүргүүлсэн байна.
Нийслэлийн газрын албаны дарга Э.Болорчулуун “100 айл орчимд ил задгай худалдаа эрхэлж байгаа иргэдийн газрыг зориулалтын дагуу ашиглуулах чиглэлээр бид мэдэгдэх хуудас өгч ажилласан. Мөн 100 айл орчимд газар эзэмшиж байгаа иргэдийн газрын гэрчилгээгээ бусдад шилжүүлэх, эзэмшлийн хугацаа нь дууссан газраа сунгуулах гэсэн өргөдлийн шийдвэрлэлтийг түр зогсоогоод байгаагаа” мэдэгджээ.
Мөн 100 айлд байршиж байсан Иргэний бүртгэлийн төвийн үйл ажиллагааг дүүргүүдэд шилжүүлсэн нь тэр орчимын замын хөдөлгөөны ачааллыг 20-40 хувь бууруулсан гэсэн тооцоо байна. НАЗХГ-ын орлогч дарга Б.Индра “100 айлын уулзвараас хойш 32-ын тойргийн уулзвар хүртэлх 1,6 км авто замын зураг төслийг одоо байгаа 9 метрийн өргөнийг 14 метр болгон өргөтгөж, хоёр талд нь 3 метр явган хүний болон дугуйн зам барихаар зураг төслийг нь гүйцэтгэж байна. Зургийн ажил энэ 7 хоногтоо бэлэн болно, гагцхүү замын ажил эхлэхэд трасст орсон газар доорх шугам сүлжээний асуудлыг шийдэх шаардлага тулгарч байна” гэжээ.
НИТХ-ын дарга С.Амарсайхан “100 орчимын газрыг Хотын Ерөнхий төлөвлөгөөтэй уялдуулж ажиллахаар төлөвлөх ёстой. 2018 оны 9 сарын 01-ээс хойш 100 айл орчимд нэг ч үйлдвэр ажиллах ёсгүй гэдэг зохион байгуулалтыг удирдлага болгож ажил хариуцаж байгаа нөхөд анхаарч ажилла” гэсэн үүрэг өгчээ. Тэгэхээр ойрын үед 100 айл орчмын зам 4-6 эгнээтэй болохоос гадна энд ажиллаж байгаа барилгын захуудыг нүүлгэх ажил нэлээд эрчимтэй явагдаж байгаа ажээ.
Сэтгэгдэл (4)